بہار: آئندہ 5 سالوں میں ایک کروڑ نوجوانوں کو ملے گی ملازمت، نتیش کابینہ کی میٹنگ میں بلو پرنٹ پیش

بہار اسمبلی انتخاب میں حیرت انگیز کامیابی کے بعد نتیش کابینہ کی آج پہلی میٹنگ ہوئی۔ اس میں نتیش کمار نے آئندہ 5 سالوں میں اپنے کاموں سے متعلق ایک بلو پرنٹ پیش کر دیا ہے۔ نتیش کمار نے میٹنگ کے بعد کہا کہ بہار حکومت نے آئندہ 5 سالوں میں ایک کروڑ نوجوانوں کو روزگار دینے کا ہدف رکھا ہے۔ اس کے لیے نیو ایج اکونومی، ٹیکنالوجی ہَب اور نئی صنعتوں کے لیے منصوبہ بنایا گیا ہے۔ اس مقصد سے ایک اعلیٰ سطحی کمیٹی بھی تشکیل دے دی گئی ہے۔

نتیش کمار کا کہنا ہے کہ ’7 عزائم-2‘ کے تحت 25-2020 کے درمیان پہلے ہی 50 لاکھ نوجوانوں کو روزگار دیا جا چکا ہے۔ نئی حکومت بننے کے فوراً بعد صنعتوں کو فروغ دینے کا کام تیز کر دیا گیا ہے۔ وزیر اعلیٰ نے کہا کہ بہار کو ’نیو ایج اکونومی‘ کا مرکز بنانے کے لیے ریاست سے منسلک بڑے صنعت کاروں اور ماہرین کے مشورہ پر پالیسیاں بنائی جائیں گی۔ ساتھ ہی مطلع کیا کہ بہار کو عالمی بیک-اینڈ ہَب اور گلوبل ورک پلیس کی شکل میں ڈھالنے کے لیے وسیع منصوبہ تیار کیا جا رہا ہے۔

بتایا جا رہا ہے کہ نوجوان آبادی کو طاقت بناتے ہوئے بہار کو مشرقی ہندوستان کا نیا ٹیکنالوجی ہَب بنانے کا منصوبہ ہے۔ اس کے لیے ڈیفنس کوریڈور، سیمی کنڈکٹر مینوفیکچرنگ پارک، گلوبل کیپبلٹی سنٹرس، میگا ٹیک سٹی اور فنٹیک سٹی کا قیام ہوگا۔ نتیش کمار نے دعویٰ کیا کہ اگر بہار کے نوجوان انسانی وسائل کو صحیح سمت ملی، تو ریاست ملک کی سب سے تیزی سے ترقی کرنے والی ریاست بن سکتی ہے۔

نتیش کمار کا کہنا ہے کہ ان کی حکومت میں بہار میں صنعت کاری نے رفتار پکڑ لی ہے۔ اب نئے منصوبہ کو عملی جامہ پہنانے کے لیے چیف سکریٹری کی صدارت میں آج اعلیٰ سطحی کمیٹی بنائی گئی۔ یہ کمیٹی ریاست میں صنعتوں کو فروغ دینے اور نوجوانوں کے لیے زیادہ سے زیادہ روزگار کے مواقع پیدا کرنے سے متعلق منصوبوں کو عملی جامہ پہنانے کا کام کرے گی۔ اس کے علاوہ انھوں نے کہا کہ ریاست میں نئی چینی ملیں اور کارخانے کھولے جائیں گے۔