بہار قانون ساز کونسل انتخابات: جے ڈی یو نے نشانت کمار، بی جے پی نے پون سنگھ کو بنایا امیدوار

بہار قانون ساز کونسل کی 9 نشستوں پر ہونے والے دو سالہ انتخابات اور ایک نشست پر ضمنی انتخاب کے لیے حکمراں اتحاد کے اہم فریقوں جنتا دل (یونائیٹڈ) اور بھارتیہ جنتا پارٹی نے اپنے امیدواروں کے ناموں کا اعلان کر دیا ہے۔ جے ڈی یو کی فہرست میں وزیر اعلیٰ نتیش کمار کے بیٹے اور حال ہی میں ریاستی کابینہ میں شامل کیے گئے نشانت کمار کا نام سب سے زیادہ توجہ کا مرکز ہے، جبکہ بی جے پی نے بھوجپوری گلوکار اور اداکار پون سنگھ کو امیدوار بنایا ہے۔

جے ڈی یو کے ریاستی صدر اومیش کشواہا کی جانب سے جاری فہرست کے مطابق پٹنہ ضلع سے نشانت کمار کو امیدوار نامزد کیا گیا ہے۔ اس کے علاوہ مدھوبنی سے بھارتی مہتا، مغربی چمپارن سے شیورانی دیوی پرجاپتی اور شیخ پورہ سے للن پرساد کو ٹکٹ دیا گیا ہے۔ للن پرساد کو ضمنی انتخاب کے لیے میدان میں اتارا گیا ہے۔ وہ دھنوک برادری سے تعلق رکھتے ہیں اور پارٹی قیادت کے قریبی مانے جاتے ہیں۔

پارٹی نے اس بار دو خواتین امیدواروں کو بھی موقع دیا ہے۔ بھارتی مہتا جے ڈی یو کی ترجمان اور خواتین ونگ کی صدر رہ چکی ہیں۔ وہ بہار ریاستی سنسکرت شکشا بورڈ کی سابق صدر بھی رہ چکی ہیں۔ دوسری جانب شیورانی دیوی پرجاپتی پارٹی کی سابق ریاستی جنرل سکریٹری رہ چکی ہیں اور مغربی چمپارن میں سرگرم تنظیمی چہرہ مانی جاتی ہیں۔

ادھر بی جے پی نے چار امیدواروں کے ناموں کا اعلان کیا ہے۔ ان میں پارٹی کے قومی میڈیا معاون انچارج ڈاکٹر سنجے میوکھ، بھوجپوری فلموں کے معروف گلوکار و اداکار پون سنگھ، انیل کمار ٹھاکر اور شیلا پانڈت شامل ہیں۔ ڈاکٹر سنجے میوکھ مسلسل تیسری بار قانون ساز کونسل کے انتخابی میدان میں ہیں، جبکہ پون سنگھ نے 2024 کے لوک سبھا انتخابات میں کاراکاٹ حلقے سے آزاد امیدوار کے طور پر قسمت آزمائی کی تھی۔

سیاسی حلقوں میں راشٹریہ لوک مورچہ کے سربراہ اپیندر کشواہا کے بیٹے اور ریاستی وزیر دیپک پرکاش کے نام پر بھی قیاس آرائیاں جاری ہیں، تاہم ان کے نام کا باضابطہ اعلان نہیں کیا گیا ہے۔ نشانت کمار اور دیپک پرکاش اس وقت ریاستی مقننہ کے کسی بھی ایوان کے رکن نہیں ہیں۔