بہار: جاجی پور میں مہاتما گاندھی سیتو پر کار ڈیوائڈر سے ٹکرائی، 1 ہلاک، 5 زخمی

بہار کے حاجی پور میں آج ایک بڑا حادثہ پیش آیا ہے۔ مہاتما گاندھی سیتو کے ستون نمبر 1 کے نزدیک ایک کار بے قابو ہو کر ڈیوائڈر سے ٹکرا گئی۔ اس حادثہ میں ایک نوجوان کی موت ہو گئی جبکہ 5 دیگر افراد زخمی ہوئے ہیں۔ واقعہ کے بعد جائے وقوع پر چیخ و پکار شروع ہو گئی اور لوگوں میں افرا تفری کا ماحول پیدا ہو گیا۔

مقامی راہگیروں کے ذریعہ اطلاع ملنے پر گنگا برج تھانہ کی پولیس جائے وقوع پر پہنچی اور سبھی زخمیوں کو صدر اسپتال میں پہنچایا۔ ڈاکٹروں نے علاج کے دوران ایک شخص کو مردہ قرار دے دیا جبکہ باقی زخمیوں کا ابتدائی علاج کرنے کے بعد انہیں پی ایم سی ایچ منتقل کر دیا۔ ذرائع کے مطابق یہ حادثہ دیر رات پیش آیا۔

مہلوک کی شناخت سارن ضلع کے نیا گاؤں تھانہ کے ڈومری گاؤں باشندہ ویدھ ناتھ سنگھ کے 35 سالہ بیٹے جئے پرکاش سنگھ کے طور پر ہوئی ہے۔ زخمیوں میں امت کمار، ہرش کمار، رنگولی کماری، روی رنجن کمار، پنکی دیوی شامل ہیں۔ سبھی لوگ پٹنہ کی طرف سے لوٹ رہے تھے۔ اس حادثے میں کار بُری طرح تباہ ہو گئی۔ مقامی پولیس نے واقعہ کے سلسلے میں معاملہ درج کر لیا ہے اور آگے کی جانچ جاری ہے۔

حادثہ کی وجوہات کا ابھی تک صحیح طریقے سے پتہ نہیں چل سکا ہے۔ لیکن ابتدائی جانچ میں یہ مانا جا رہا ہے کہ ڈرائیور نے گاڑی پر سے اپنا توازن کھو دیا تھا جس کی وجہ سے یہ واقعہ پیش آیا۔ حاجی پور میں اس طرح کے سڑک حادثات میں اضافہ ہونے سے مقامی انتظامیہ اور ٹریفک ڈپارٹمنٹ کے لیے ایک بڑا چیلنج پیدا ہو گیا ہے۔ اس کے تحت لوگوں کے محفوظ سفر کو یقینی بنانے کے لیے زیادہ سے زیادہ بیداری پھیلانے کی ضرورت ہے تاکہ آئندہ اس طرح کے واقعات سے بچا جا سکے۔