بہار انتخابات: 3 مراحل میں 28 اکتوبر، 3 نومبر اور 7 نومبر کو پولنگ، 10 نومبر کو نتائج کا اعلان

بہار اسمبلی انتخابات کا اعلان کر دیا گیا۔ اس مرتبہ تین مراحل میں پولنگ ہوگی اور 10 نومبر کو نتائج کا اعلان کیا جائے گا

بہار انتخابات کا اعلان کرتے چیف الیکش کمشنر سنیل اروڑا / ویڈیو گریب
بہار انتخابات کا اعلان کرتے چیف الیکش کمشنر سنیل اروڑا / ویڈیو گریب
user

قومی آوازبیورو

25 Sep 2020, 1:16 PM

بہار اسمبلی انتخابات: 28 اکتوبر، 3 نومبر اور 7 نومبر کو پولنگ، 10 نومبر کو نتائج کا اعلان

پہلے مرحلہ کی پولنگ - 28 اکتوبر

دوسرے مرحلہ کی پولنگ- 3 نومبر

تیسرے مرحلہ کی پولنگ- 7 نومبر

نتائج کا اعلان - 10 نومبر

25 Sep 2020, 1:11 PM

کورونا کی احتیاطی تدابیر کے ساتھ تین مراحل میں ہوگی پولنگ، الیکشن کمیشن

چیف الیکشن کمشنر نے پریس کانفرنس کے دوران بہار اسمبلی انتخابات کی تاریخوں کا اعلان کر دیا ہے۔ ریاست کے پولنگ تین مراحل میں کرائے جائیں گے۔ پہلے مراحلہ میں 16 اضلاع کی 71 سیٹوں، دوسرے مرحلہ میں 17 اضلاع کی 94 سیٹوں اور تیسرے مرحلہ میں 15 اضلاع کی 78 سیٹوں پر ووٹنگ ہوگی۔

تینوں مراحل

پہلے مرحلہ میں 71 سیٹوں پر پولنگ، 31 ہزار پولنگ اسٹیشن

دوسرے مرحلہ میں 94 سیٹوں پر پولنگ، 42 ہزار پولنگ اسٹیشن

تیسرے مرحلہ میں 78 سیٹوں پر پولنگ، 33.5 ہزار پولنگ اسٹیشن

25 Sep 2020, 1:00 PM

کورونا متاثرین بھی ووٹنگ کرینگے، کاغذات نامزدگی آن لائن داخل ہونگے، ای سی

اس بار ووٹنگ کے لئے ایک گھنٹہ اضافی وقت دیا جائے گا، ووٹنگ صبح سات سے شام چھ بجے تک ہوگی۔ صرف پانچ افراد ڈور ٹو ڈور کیمپین کے لئے جا سکیں گے۔ اس بار کاغذات نامزدگی اور حلف نامہ بھی آن لائن طریقہ سے داخل کئے جائیں گے، ضمانت کی رقم بھی آن لائن جمع کی جا سکے گی۔ نامزدگی کے وقت صرف دو افراد امیدوار کے ساتھ موجود ہوں گے۔ انتخابی مہم کے دوران کسی کو بھی مصافحہ کرنے کی اجازت نہیں ہوگی۔

ووٹنگ کے آخری وقت پر کورونا متاثرین اپنے ووٹ کا استعمال کرسکیں گے، جس کے لئے علیحدہ انتظامات کیے جائیں گے۔ انتخابی مہم بنیادی طور پر ورچوئل ہوگی، چھوٹی ریلی کی جگہ اور وقت ڈی ایم طے کریں گے۔ ہر پولنگ بوتھ پر صابن، سینیٹائزر اور دیگر چیزیں مہیا کی جائیں گی۔


25 Sep 2020, 12:56 PM

ہر بوتھ پر صرف ایک ہزار ووٹر ہی ووٹ ڈالیں گے، ای سی

چیف الیکشن کمشنر سنیل اروڑا نے پریس کانفرنس کے دران کہا، بہار میں کل 243 سیٹوں پر پولنگ ہوگی اور اس بار پولنگ اسٹیشن کی تعداد اور مین پاور میں اضافہ کیا گیا ہے۔ بہار میں 2020 کے چناؤ میں ساتھ کروڑ سے زیادہ ووٹر ووٹنگ کریں گے۔ اس مرتبہ ایک بوتھ پر ایک ہزار ہی ووٹر ہوں گے۔

انتخابات میں 6 لاکھ پی پی ای کٹ ریاستی الیشن کمیشن کو دی جائیں گی، 46 لاکھ ماسک کا بھی استعمال ہوگا۔ سات لاکھ ہینڈ سینیٹائز کا استعمال کیا جائے گا، علاوہ ازیں 6 لاکھ فیس شیلڈ فراہم کی جائیں گی۔

25 Sep 2020, 12:39 PM

تاریخوں کے اعلان کے لئے الیکشن کمیشن کی پریس کانفرنس شروع

بہار اسمبلی انتخابات کی تاریخوں کے اعلان کے لئے الیکشن کمیشن کی پریس کانفرنس کا آغاز ہو گیا ہے اور چیف الیکشن کمشنر سنیل اروڑا معلومات فراہم کر رہے ہیں۔ سنیل اروڑا نے پریس کانفرنس کے دوران کہا کہ کورونا بحران کی وجہ سے دنیا کے 70 ممالک میں انتخابات کو ملتوی کر دیا گیا ہے۔ بہار اور ضمنی انتخابات کے حوالہ سے مسلسل غور و خوض کیا گیا۔ بہار ملک کی سب سے بڑی ریاستوں میں سے ایک ہے اور یہ انتخابات کورونا کے دور کے سب سے بڑے انتخابات ہیں۔


25 Sep 2020, 12:32 PM

بہار اسمبلی انتخابات: الیکشن کمیشن کچھ دیر میں کرے گا تاریخوں کا اعلان

بہار میں اسمبلی انتخابات کا اعلان آج ہونے جا رہا ہے۔ الیکشن کمیشن نے دوپہر 12.30 پر پریس کانفرنس طلب کی ہے۔ ذرائع کا کہنا ہے کہ پولنگ تین مراحل میں ہو سکتی ہے، جبکہ گزشتہ انتخابات میں پولنگ پانچ مراحل میں ہوئی تھی۔ اس مرتبہ دیوالی سے قبل اسمبلی تشکیل دی جا سکتی ہے۔ْ

وبا کی وجہ سے متعدد حزب اختلاف کی جماعتیں انتخابات ملتوی کرنے کا مطالبہ کر رہی تھیں۔ یہاں تک کہ بہار میں نتیش کمار کی سربراہی والی این ڈی اے کی حکومت نے جولائی میں الیکشن کمیشن کو ایک خط لکھ کر انتخابات ملتوی کرنے کی درخواست کی تھی۔ پارٹی نے کہا تھا کہ کورونا کے انفیکشن کے خوف کے سبب بڑے پیمانے پر انتخابات کرانا خطرناک ہو سکتا ہے۔

واضح رہے کہ 243 ارکان پر مشتمل بہار اسمبلی کی میعاد کار 29 نومبر کو ختم ہونے جا رہی ہے۔ توقع کی جا رہی ہے کہ اکتوبر کے وسط میں انتخابات ہوں گے۔ وہیں، یہ امکان بھی موجود ہے کہ انتخابات کئی مراحل میں ہوں گے۔ اس سے قبل الیکشن کمیشن نے چار ستمبر کو اعلان کیا تھا کہ اس نے بہار اسمبلی انتخابات کے ساتھ ساتھ 65 زیر التواء ضمنی انتخابات کرانے کا بھی فیصلہ کیا ہے۔ ایسی صورتحال میں ضمنی انتخابات کی تاریخوں کا بھی آج اعلان کئے جانے کا امکان ہے۔

اس سے پہلے بہار میں انتخابات کرانے کا معاملہ سپریم کورٹ تک بھی پہنچا ہے۔ تاہم، عدالت عظمیٰ نے اس معاملہ میں دائر عرضی کو خارج کرتے ہوئے کہا کہ 'کورونا کی بنیاد پر انتخابات کو روکا نہیں جا سکتا ہے اور الیکشن کمیشن کے اختیارات میں مداخلت نہیں کی جا سکتی ہے'۔ سماعت کرنے والے بینچ نے کہا تھا کہ 'کوڈ کی بنیاد پر انتخابات ملتوی نہیں کیے جاسکتے، خاص طور پر جب الیکشن کمیشن کی جانب سے کوئی نوٹیفکیشن جاری نہیں کیا گیا ہو۔ یہ عدالت الیکشن کمشنر کو یہ نہیں بتا سکتی کہ انہیں کیا کرنا ہے، وہ خود ان معاملات پر غور کریں گے۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔