اعظم خان کی اسمبلی رکنیت ختم ہونے کی اطلاع اسمبلی اسپیکر ستیش مہانا نے انتخابی کمیشن کو دی

جمعرات کو ایم پی-ایم ایل اے کورٹ نے اعظم خان کو ہیٹ اسپیچ معاملے میں 3 سال کی سزا سنائی تھی، اس سزا کی وجہ سے ان کی اسمبلی رکنیت ختم ہو گئی ہے جس کی اطلاع آج انتخابی کمیشن کو بھیج دی گئی۔

اعظم خان، تصویر آئی اے این ایس
اعظم خان، تصویر آئی اے این ایس
user

قومی آوازبیورو

اتر پردیش کے رامپور واقع ایم پی-ایم ایل اے کورٹ سے 3 سال کی سزا ہونے کے بعد اعظم خان کی اسمبلی رکنیت ختم کر دی گئی ہے۔ اسمبلی اسپیکر ستیش مہانا نے کورٹ کے حکم کی کاپی ملنے کے فوراً بعد اعظم خان کی رکنیت ختم کر دی اور اس کی اطلاع انتخابی کمیشن کو بھیج دی۔ ایسے میں اب رامپور اسمبلی میں آئندہ 6 ماہ میں ضمنی انتخاب کرایا جا سکتا ہے۔

اس سے قبل جمعرات کو ایم پی-ایم ایل اے کورٹ نے اعظم خان کو ہیٹ اسپیچ معاملے میں تین سال کی سزا سنائی تھی۔ یہ معاملہ 2019 کے لوک سبھا انتخاب کے وقت کا ہے۔ الزام ہے کہ سماجوادی پارٹی لیڈر اعظم خان نے رامپور کے مِلک اسمبلی حلقہ میں ایک انتخابی جلسہ میں مبینہ طور پر قابل اعتراض اور اشتعال انگیز بیان دیا تھا۔ اس پر کافی تنازعہ ہوا تھا اور اپوزیشن پارٹیوں نے بھی خوب ہنگامہ کیا تھا۔


مذکورہ انتخابی جلسہ کے بعد بی جے پی لیڈر آکاش سکسینہ نے اعظم خان کے خلاف تھانہ میں شکایت دی تھی جس پر کارروائی کرتے ہوئے پولیس نے مِلک کوتوالی میں اعظم خان کے خلاف ضابطہ اخلاق کی خلاف ورزی اور اشتعال انگیز تقریر کا معاملہ درج کیا تھا۔ اس کے بعد یہ معاملہ رامپور کی ایم پی-ایم ایل اے عدالت میں چلی گئی تھی۔

بہرحال، اشتعال انگیز تقریر معاملے میں سزا سنائے جانے کے بعد اعظم خان کے پاس اب اوپر عدالت میں جانے کا متبادل موجود ہے۔ ماہرین قانون کا کہنا ہے کہ رامپور کے ایم پی-ایم ایل اے کورٹ نے جو سزا سنائی ہے اس میں اسی عدالت کو ضمانت دینے کا بھی حق ہے۔ ساتھ ہی اعظم خان اس فیصلے کے خلاف سیشن کورٹ میں جا سکتے ہیں۔ سیشن کورٹ میں انھیں 30 دنوں کے اندر عرضی داخل کرنی ہوگی۔ اگر وہاں سے بھی انھیں راحت نہیں ملی تو وہ ہائی کورٹ جا کستے ہیں اور اس کے بعد سپریم کورٹ جانے کا بھی ان کے پاس متبادل موجود ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔