جمنا میں زہر: اروند کیجریوال سے الیکشن کمیشن کا جواب طلب، کل صبح 11 بجے تک کی مہلت

نئی دہلی: دہلی کے سابق وزیر اعلیٰ اور عام آدمی پارٹی کے سربراہ اروند کیجریوال کے جمنا کے پانی میں زہر ملانے کے بیان پر تنازعہ تھمنے کا نام نہیں لے رہا۔ الیکشن کمیشن نے کیجریوال کو نوٹس جاری کرتے ہوئے ان سے پانچ سوالات پر وضاحت مانگی ہے۔ کمیشن نے انہیں ان سوالات کے جوابات جمع کرانے کے لیے کل صبح 11 بجے تک کی مہلت دی ہے۔

الیکشن کمیشن نے جن سوالات کے جواب طلب کیے ہیں، وہ یہ ہیں:

1. ہریانہ حکومت نے جمنا میں کون سا زہر ملایا؟

2. زہر کی مقدار، نوعیت اور اس کے اثرات کے ثبوت کیا ہیں؟

3. زہر کہاں پایا گیا تھا؟

4. دہلی جل بورڈ کے کن انجینئروں نے زہر کہاں اور کیسے شناخت کی؟

5. زہریلے پانی کو دہلی میں داخل ہونے سے روکنے کے لیے کیا اقدامات کیے گئے؟

اروند کیجریوال نے اپنے بیان میں کہا تھا کہ ہریانہ حکومت کی جانب سے دہلی کو فراہم کیا جانے والا پانی انتہائی آلودہ اور زہریلا ہے۔ ان کے مطابق، یہ پانی اتنا آلودہ ہے کہ دہلی کے واٹر ٹریٹمنٹ پلانٹس بھی اسے صاف کرنے کے قابل نہیں ہیں۔ کیجریوال نے الزام لگایا تھا کہ بی جے پی دہلی کے عوام کو اجتماعی طور پر نقصان پہنچانا چاہتی ہے، مگر ان کی حکومت ایسا نہیں ہونے دے گی۔

کیجریوال کے اس بیان پر بی جے پی نے شدید ردعمل دیا تھا اور ان کے الزامات کو جھوٹا اور بے بنیاد قرار دیا تھا۔ جبکہ کانگریس کا کہنا تھا کہ کیجریوال نے جھوٹے الزامات عائد کئے ہیں اور اگر اس میں ذرا سی بھی سچائی ہے تو انہیں قانونی چاراجوئی کرنی چاہئے تاکہ ہریانہ حکومت کو کٹہرے میں کھڑا کیا جا سکے۔ اس کے بعد الیکشن کمیشن نے ان سے اپنے دعوے کے ثبوت فراہم کرنے کو کہا تھا۔

کیجریوال نے اپنے جواب میں دہلی جل بورڈ کے سی ای او کے ایک خط کا حوالہ دیا اور وضاحت پیش کی کہ ان کے بیانات ایک شہری مسئلے کو اجاگر کرنے کے لیے دیے گئے تھے۔ تاہم، کمیشن نے مزید وضاحت کے لیے پانچ اہم سوالات پر وضاحت مانگی ہے۔