’کارگل وجے دیوس‘ پر آرمی چیف جنرل دھیرج سیٹھ نے شہداء کو پیش کیا خراج عقیدت

دراس (لداخ): ملک بھر میں آج کارگل وجے دیوس کی27 ویں برسی منائی جا رہی ہے۔ اس موقع پر 1999 کی اس جنگ کے شہداء کو خراجِ عقیدت پیش کیا گیا۔ لداخ کے دراس میں واقع کارگل وار میموریل پر ہندوستانی آرمی چیف جنرل دھیرج سیٹھ نے شہداء کو گلہائے عقیدت پیش کیے اور ان کی قربانیوں کو سلام کیا۔ صحافیوں سے بات چیت کے دوران جنرل دھیرج سیٹھ نے کہا کہ ’’میں اپنے تمام بہادر شہداء کو خراج عقیدت پیش کرتا ہوں۔ ہندوستانی فوج کا سپاہی دنیا کی کسی بھی فوج کے سپاہی سے بہتر ہے۔ اس کی بہادری اور صلاحیت کا کوئی مقابلہ نہیں۔ ہندوستانی آرمی ملک کی سلامتی اور ترقی کے لیے پوری طرح پُرعزم ہے۔ فوج آئندہ بھی ملک کا وقار بلند کرے گی۔‘‘

انہوں نے اپنی یونٹ کے ایک فوجی کی لکھی ہوئی نظم کی چند سطریں بھی شیئر کیں۔ انہوں نے کہا کہ جب بھی وہ کارگل کے جانبازوں کو یاد کرتے ہیں تو انہیں اپنی ہی یونٹ کے ایک فوجی کی لکھی ہوئی ایک ’نظم‘ یاد آتی ہے۔ نظم کی سطریں کچھ یوں تھیں ’’مرنا سب کو ہے، تم بھلے مرے۔ کرکے نمک ہلال، لڑتے ہوئے گرے، بھولیں گے آپ نہیں جو چھپ گئی شکل، سفید زمین پر نام ہوا تمہارا اٹل‘‘۔ جنرل سیٹھ نے کہا کہ ’’ہندوستانی فوج ہر حالت میں قوم کی سلامتی اور وقار کے تحفظ کے لیے تیار ہے۔ انہوں نے کہا کہ ایک فوجی کی زندگی فرض، عزت اور وفاداری کے اصولوں پر قائم ہوتی ہے اور بہادر جوانوں کی عظیم قربانی آنے والی نسلوں کو ہمیشہ متاثر کرتی رہے گی۔‘‘

انہوں نے کہا کہ ’’کارگل وجے دیوس کی 27 ویں برسی کے موقع پر یہاں موجود ہونا میرے لیے باعثِ فخر اور باعثِ تحریک بھی ہے۔ میں اپنے بہادر شہداء اور ان کے اہلِ خانہ کو خراجِ عقیدت پیش کرتا ہوں۔ وزیرِ دفاع کی موجودگی آئندہ برسوں میں بھی ہندوستانی فوج کے لیے حوصلہ افزائی کا ذریعہ بنی رہے گی۔‘‘ اس موقع پر دراس میں واقع کارگل وار میموریل میں منعقدہ پروگرام سے خطاب کرتے ہوئے وزیرِ دفاع راج ناتھ سنگھ نے کہا کہ ’’کارگل وار میموریل پر شان سے لہراتا ترنگا اس عظیم قربانی کی علامت ہے، جو اس کی عزت، وقار اور عظمت کے لیے ادا کی گئی۔ آج سے ٹھیک 27 برس قبل جولائی 1999 میں مادرِ وطن پر بزدلانہ اور فریب پر مبنی حملہ کیا گیا تھا۔‘‘

انہوں نے کہا کہ ’’پاکستان نے دراندازوں کے ذریعے دھوکے اور فریب سے ان پہاڑی چوٹیوں پر قبضہ کر لیا تھا، جو سردیوں کے موسم میں خالی رہتی تھیں۔ حالانکہ وہ ہندوستانی فوجیوں کی بہادری، ثابت قدمی اور شجاعت کا درست اندازہ نہ لگا سکا۔ ہندوستانی فوجیوں نے نہ صرف ان چوٹیوں کو دوبارہ حاصل کیا، بلکہ بہادری اور قربانی کی ایک نئی مثال بھی قائم کی۔ ملک آج ہفتہ کے روز کارگل وجے دیوس کی 27 ویں برسی منا رہا ہے۔ یہ دن 1999 کی کارگل جنگ میں آپریشن وجے کے دوران عظیم قربانی پیش کرنے والے 527 فوجیوں کو خراجِ عقیدت پیش کرنے اور دشوار گزار محاذوں پر بے مثال جرأت و بہادری کا مظاہرہ کرنے والے ہزاروں فوجیوں کی شجاعت کو یاد کرنے کا موقع ہے۔‘‘