فلم ’جُگ جُگ جیو‘ کی شوٹنگ کے دوران کورونا کا قہر، انل کپور، ورون دھون اور نیتو سنگھ کورونا پازیٹو

عالمی وبا کورونا نے پوری دنیا میں قہر برپا کر رکھا ہے، لیکن ہندوستان سمیت کئی ممالک میں اب سماجی و معاشی سرگرمیاں شروع ہو گئی ہیں تاکہ گزشتہ کئی مہینوں سے معیشت پر پڑے مضر اثرات سے باہر نکلا جا سکے۔ ہندوستان میں فلموں کی شوٹنگ بھی شروع ہو چکی ہے لیکن اس درمیان ایک بری خبر سامنے آ رہی ہے۔ میڈیا ذرائع سے موصول ہو رہی خبروں کے مطابق فلم ’جُگ جُگ جیو‘ کی شوٹنگ کے دوران کورونا نے اپنا قہر برپا کر دیا ہے۔ فلم سے جڑے کئی اہم افراد کورونا ٹیسٹ میں پازیٹو پائے گئے ہیں جس کی وجہ سے فلم کی شوٹنگ روکنی پڑ گئی ہے۔

فلم ’جُگ جُگ جیو‘ کی شوٹنگ دہلی میں ہو رہی تھی جہاں کورونا اس وقت بے قابو نظر آ رہا ہے۔ بتایا جا رہا ہے کہ فلم میں مرکزی کردار نبھانے والے اداکار انل کپور اور ورون دھون کے ساتھ ساتھ اداکارہ نیتو سنگھ اور ہدایت کار راج مہتا بھی کورونا کی زد میں آ گئے ہیں۔ ہندی نیوز پورٹل ’اے بی پی لائیو‘ پر شائع خبر کے مطابق دھرما پروڈکشن کے تحت بننے والی اس فلم کی شوٹنگ فوری طور پر روک دی گئی ہے تاکہ کورونا انفیکشن کا پھیلاؤ فلم یونٹ کے کسی دوسرے رکن تک نہ ہو۔