ووٹنگ میں بے ضابطگی کی خبروں کے درمیان راہل گاندھی رائے بریلی پہنچے، پولنگ بوتھوں کا لیا جائزہ

 لوک سبھا انتخابات کے پانچویں مرحلے میں اتر پردیش کی رائے بریلی لوک سبھا سیٹ پر ووٹنگ جاری ہے۔ اسی درمیان کئی پولنگ بوتھ سے ای وی ایم کی خرابی و ووٹنگ میں بے ضابطگی کی خبریں سوشل میڈیا پر آنے لگیں جس کے بعد کانگریس کے لیڈر اور رائے بریلی پارلیمانی حلقے کے امیدوار راہل گاندھی رائے بریلی پہنچے اور پولنگ بوتھوں کا جائزہ لیا۔ اس موقع پر راہل گاندھی پپلیشور ہنومان مندر بھی گئے۔

راہل گاندھی کے رائے بریلی پہنچنے کی خبر ملتے ہی ان سے ملنے کے لیے لوگ جمع ہونے لگے اور دیکھتے ہی دیکھتے ہنومان مندر کے اطراف لوگوں کی ایک بڑی بھیڑ جمع ہوگئی۔ راہل گاندھی ایسے وقت رائے بریلی پہنچے ہیں جب کانگریس پارٹی نے دعویٰ کیا ہے کہ کئی پولنگ بوتھوں پر ووٹنگ کے دوران بے ضابطگیاں ہو رہی ہیں۔ راہل گاندھی بچھراواں کے پولنگ بوتھ پر گئے اور وہاں کی صورت حال کا جائزہ لیا اور لوگوں سے بات بھی کی۔ اس کے بعد راہل گاندھی ہرچند پور اسمبلی سے ہوتے ہوئے پورے رائے بریلی کے پولنگ مراکز کا دورہ کریں گے۔

رائے بریلی سیٹ پر راہل گاندھی کا مقابلہ بھارتیہ جنتا پارٹی کے لیڈر اور یوگی حکومت میں وزیر دنیش پرتاپ سنگھ سے ہے۔ رائے بریلی کانگریس کا گڑھ رہا ہے۔ راہل گاندھی کی والدہ سونیا گاندھی اس سیٹ سے چار بار ایم پی رہ چکی ہیں، اس بار راہل گاندھی یہاں سے انتخابی میدان میں ہیں۔ راہل گاندھی رائے بریلی کے تمام بوتھوں کا دورہ کر رہے ہیں۔ اسی طرح قنوج لوک سبھا میں ووٹنگ کے دوران بے ضابطگی کی شکایتوں کے درمیان سماجوادی پارٹی کے سربراہ اکھلیش یادو خود تمام بوتھوں کا جائزہ لینے نکل پڑے ہیں۔