’اس حکومت میں لا اینڈ آرڈر کا ہی انکاؤنٹر ہوگیا‘، اکھلیش یادو نے گورکھپور قتل معاملہ میں یوگی حکومت کو بنایا ہدف تنقید

 اتر پردیش کے گورکھپور میں بی جے پی لیڈر اور سابق کونسلر راجکمار چوہان کے بہیمانہ قتل کو لے کر ریاست میں سیاسی رسہ کشی بدستور جاری ہے۔ اس دوران سماجوادی پارٹی کے قومی صدر اکھلیش یادو نے اس قتل کو لے کر وزیر اعلیٰ یوگی آدتیہ ناتھ کو نشانہ بنایا اور ریاست میں امن و امان کی صورتحال پر سوال اٹھائے۔ انہوں نے کہا کہ اس حکومت میں لا اینڈ آرڈر کا ہی انکاؤنٹر ہوگیا۔

گورکھپور کی واردات کے حوالے سے اتر پردیش میں امن و امان کی صورتحال پر سوال اٹھاتے ہوئے ایس پی صدر اکھلیش یادو نے کہا کہ گورکھپور میں قتل ہوا اور ان کی ہی پارٹی کے راجیہ سبھا ایم پی (رادھا موہن اگروال) نے کہا کہ اگر مجرم نہیں پکڑے گئے تو وہ حکومت کو بے نقاب کردیں گے۔ یہ بھارتیہ جنتا پارٹی (بی جے پی) کے وہ لیڈر ہیں جنہوں نے اپنی سیٹ خالی کی تب وزیراعلیٰ (یوگی آدتیہ ناتھ) منتخب کئے گئے ہیں۔ وہ کہہ رہے ہیں کہ اگر قصوروار نہیں پکڑے گئے تو حکومت کو برہنہ کردیں گے۔

اکھلیش یادو نے کہا کہ وزیر اعظم کے حلقہ انتخاب میں ایک طلبا لیڈرکو دوڑا دوڑا کر قتل کر دیا گیا۔ اس کے لیے ذمہ دار کون ہے؟ بدایوں میں ایک ماں اور خاندان جن کی جان گئی وہ لگاتار حکومت سے کہتے رہے کہ ان کی جان کو خطرہ ہے، ہمیں ماردیا جائے گا اور اس کے بعد دونوں بھائیوں کی جان چلی گئی۔ اس کے لیے کون ذمہ دار ہے ؟ اکھلیش یادو نے کہا کہ وزیر اعلیٰ سمجھ تو لو کہ یہ کیا ہو رہا ہے؟ اس حکومت میں لا اینڈ آرڈر کا ہی انکاؤنٹر ہوگیا ہے۔

یاد رہے کہ 17 مارچ کو چلوا تال تھانہ علاقہ کے برگدوا میں بی جے پی لیڈر اور پراپرٹی ڈیلر راج کمار چوہان کا بے دردی سے قتل کر دیا گیا۔ ملزمین نے انہیں دوڑا دوڑا کر گولی مار اور کئی بار چاقوؤں سے وار کئے۔ اس واردات کے بعد پورے علاقے میں کشیدگی پھیل گئی ہے۔ وہیں بی جے پی کے راجیہ سبھا ممبر پارلیمنٹ رادھا موہن داس اگروال نے بھی اس واردات کو افسوس ناک بتایا اور کہا کہ اگر مجرموں کو بچانے کی کوشش کی گئی تو وہ حکومت کو راجیہ سبھا میں برہنہ کردیں گے۔