اجے رائے کا بی جے پی پر طنز: عوام کو مذہبی و سماجی تنازعات میں الجھا رہی ترقی اور روزگار میں ناکام حکومت

لکھنؤ: اتر پردیش کانگریس کے صدر اجے رائے نے بھارتیہ جنتا پارٹی (بی جے پی) حکومت پر سخت حملہ کرتے ہوئے الزام عائد کیا ہے کہ حکومت ترقی، روزگار، مہنگائی اور دیگر بنیادی مسائل سے عوام کی توجہ ہٹانے کے لیے مذہبی اور سماجی تنازعات کو ہوا دے رہی ہے۔ انہوں نے ہلدوانی میں ’شدھی کرن‘ کو لے کر پیدا ہوئے تنازعے کا حوالہ دیتے ہوئے کہا کہ بی جے پی حکومت دباؤ میں ہے اور اب گھبراہٹ کا شکار نظر آ رہی ہے۔

اجے رائے نے کہا کہ ہلدوانی میں کانگریس ارکان پارلیمنٹ نے جس طرح حکومت پر دباؤ بنایا، اس کے بعد پورے ملک میں یہ پیغام گیا کہ بی جے پی حکومت دلت مخالف ہے اور دلتوں کی توہین کر رہی ہے۔ ان کا دعویٰ تھا کہ اس معاملے میں حکومت بیک فٹ پر آ گئی ہے۔ انہوں نے مطالبہ کیا کہ واقعے میں ملوث افراد کے نام عوام کے سامنے لائے جائیں اور انہیں گرفتار کرکے جیل بھیجا جائے۔

کانگریس صدر نے اتر پردیش میں فرقہ وارانہ کشیدگی کے معاملے پر بھی ریاستی حکومت کو نشانہ بنایا۔ انہوں نے الزام لگایا کہ حکومت ایسے حالات پیدا کرنے کی کوشش کر رہی ہے جن سے ہندو مسلم تنازعات میں اضافہ ہو اور سماج میں باہمی بھائی چارہ متاثر ہو۔ انہوں نے سہارنپور اور مظفر نگر کا حوالہ دیتے ہوئے کہا کہ ماضی میں بھی اس طرح کے تجربات کیے جا چکے ہیں۔

اجے رائے نے وارانسی میں مساجد کو نقصان پہنچانے کا الزام عائد کرتے ہوئے مرادآباد کی مصطفیٰ مسجد کو نوٹس دیے جانے اور سنبھل کے واقعات کا بھی ذکر کیا۔ ان کے مطابق ایسے معاملات کے ذریعے عوام کو اصل مسائل سے دور رکھنے کی کوشش کی جا رہی ہے۔

انہوں نے کہا کہ بی جے پی حکومت ریاست میں ترقی کے محاذ پر کامیاب نہیں رہی۔ حکومت نے عوام سے جو وعدے کیے تھے، انہیں پورا کرنے کے بجائے مختلف معاملات اٹھا کر لوگوں کی توجہ بھٹکائی جا رہی ہے۔ تاہم اجے رائے نے دعویٰ کیا کہ اب عوام حکومت کی اس حکمت عملی کو سمجھنے لگی ہے اور بی جے پی کو اس سے سیاسی فائدہ نہیں ملے گا۔

وندے ماترم سے متعلق سوال پر اجے رائے نے کہا کہ ملک میں ہر شخص کو رہنے اور اپنی بات کہنے کی آزادی حاصل ہے اور اس پر کسی طرح کی پابندی نہیں لگائی جا سکتی۔ انہوں نے کہا کہ کانگریس وندے ماترم کا احترام کرتی ہے اور پارٹی کے چھوٹے بڑے تمام پروگراموں میں اس کا گیت گایا جاتا ہے۔ ان کا الزام تھا کہ بی جے پی اس معاملے پر ملک میں غلط فہمیاں پھیلا رہی ہے۔

اجے رائے نے بے روزگاری اور مہنگائی کو بھی حکومت کی بڑی ناکامی قرار دیا۔ انہوں نے کہا کہ اتر پردیش کے نوجوانوں کو روزگار نہیں مل رہا، جس کی وجہ سے وہ پریشان ہیں، جبکہ بڑھتی ہوئی قیمتوں نے عام لوگوں کی مشکلات میں مزید اضافہ کر دیا ہے۔ انہوں نے حکومت پر زور دیا کہ سیاسی تنازعات کے بجائے روزگار، مہنگائی اور ترقی جیسے حقیقی عوامی مسائل پر توجہ مرکوز کرے۔