دہلی کے 39 میں سے 36 مراکز پر پی ایم 2.5 کی سطح محفوظ حد سے زیادہ، وزیرپور سب سے آلودہ: اجے ماکن

ئی دہلی: کانگریس کے سینئر رہنما اجے ماکن نے دہلی کی فضائی آلودگی سے متعلق تازہ اعداد و شمار جاری کرتے ہوئے دعویٰ کیا ہے کہ شہر کے بیشتر فضائی نگرانی مراکز پر پی ایم 2.5 کی سطح عالمی ادارۂ صحت کی محفوظ حد سے زیادہ ہے، جبکہ موسمی اثرات کو الگ کرنے کے بعد بھی دہلی کی حقیقی پی ایم 10 آلودگی گزشتہ سال کے مقابلے میں مسلسل بلند ہے۔

اجے ماکن نے سوشل میڈیا پلیٹ فارم ایکس پر جاری ویڈیو میں کہا کہ 8 اگست صبح 10 بجے سے 9 اگست صبح 10 بجے تک کے اعداد و شمار کا جائزہ لیا گیا اور اس کا موازنہ گزشتہ سال 2 اگست سے 16 اگست 2025 کے اوسط سے کیا گیا اور اعداد و شمار مرکزی آلودگی کنٹرول بورڈ سے لیے گئے ہیں۔

انہوں نے بتایا کہ دہلی کا اوسط اے کیو آئی 100 ریکارڈ کیا گیا، جبکہ موسمی اثرات الگ کرنے کے بعد بھی یہ گزشتہ سال کے مقابلے میں زیادہ رہا۔ اجے ماکن نے کہا کہ گیسوں، خصوصاً این او 2 کے اعداد و شمار سے متعلق بین الاقوامی تحقیق میں بعض خامیوں کی نشاندہی ہوئی ہے، اس لیے ان کے موجودہ تجزیے کی بنیاد پی ایم 2.5 اور پی ایم 10 کے اعداد و شمار ہیں۔

اجے ماکن کے مطابق موسمی اثرات کو مکمل طور پر الگ کرنے کے بعد بھی دہلی کی اپنی پی ایم 10 آلودگی مسلسل 71 دن سے گزشتہ سال کے انہی دنوں کے مقابلے میں زیادہ ہے۔ ان کا کہنا تھا کہ مئی کے بعد دستیاب اعداد و شمار میں ایک بھی دن ایسا نہیں آیا جب پی ایم 10 کی سطح گزشتہ سال سے کم رہی ہو، جبکہ ایک دن کا ڈیٹا دستیاب نہیں ہے۔ ان 71 دنوں کے دوران اوسط فرق 15 مائیکروگرام فی مکعب میٹر رہا۔

انہوں نے مزید کہا کہ رواں سال کے 220 دنوں کے اعداد و شمار میں سے 147 دن ایسے رہے جن میں پی ایم 10 کی سطح گزشتہ سال کے مقابلے میں زیادہ تھی۔ اجے ماکن نے اسے ایک مستقل بگاڑ قرار دیتے ہوئے کہا کہ یہ محض موسمی اتار چڑھاؤ نہیں ہے۔

ان کے مطابق گزشتہ سال کے اعداد و شمار سے موازنہ کرنے والے 28 فضائی نگرانی مراکز میں موسمی اثرات الگ کرنے کے بعد ہر ایک کی صورتحال گزشتہ سال سے خراب پائی گئی، جبکہ اوسط اے کیو آئی نو پوائنٹس زیادہ رہا۔ انہوں نے کہا کہ دہلی کے کسی علاقے کو اس صورتحال سے استثنا حاصل نہیں ہے۔

اجے ماکن نے بتایا کہ ایک ہی دن میں دہلی کے اے کیو آئی میں 35 پوائنٹس کا اضافہ ہوا اور بیشتر فضائی نگرانی مراکز گزشتہ دن کے مقابلے میں مزید خراب ہوئے۔ ان کے مطابق 49 میں سے 22 مراکز پر کاربن مونو آکسائیڈ سب سے بڑا آلودہ عنصر رہا۔

انہوں نے کہا کہ دہلی کے 39 میں سے 36 فضائی نگرانی مراکز پر پی ایم 2.5 کی سطح عالمی ادارۂ صحت کی محفوظ حد سے زیادہ ہے۔ ایکس پوسٹ میں شہر کا اوسط اے کیو آئی 100 بتایا گیا، جبکہ سب سے خراب صورتحال وزیرپور میں رہی، جہاں موسمی اثرات الگ کرنے کے بعد اے کیو آئی 133 اور پی ایم 10 کی سطح 149 مائیکروگرام فی مکعب میٹر ریکارڈ کی گئی، جو عالمی ادارۂ صحت کی حد سے 3.3 گنا زیادہ ہے۔

اجے ماکن نے حکومت سے مطالبہ کیا کہ تعمیراتی سرگرمیوں اور سڑکوں کی دھول سے پیدا ہونے والی پی ایم 10 آلودگی، جبکہ صنعتوں، گاڑیوں اور حیاتیاتی ایندھن کے جلنے سے پیدا ہونے والی پی ایم 2.5 آلودگی کے ذرائع پر فوری سخت کارروائی کی جائے۔ انہوں نے وزیرپور میں مقامی آلودگی کے ذرائع کے خلاف فوری اقدامات اور صحت سے متعلق انتباہ جاری کرنے کے ساتھ ساتھ فضائی معیار کے انتظام سے متعلق کمیشن اور دہلی آلودگی کنٹرول کمیٹی کی جوابدہی طے کرنے کا بھی مطالبہ کیا۔ اجے ماکن نے کہا کہ سانس لینا بنیادی حق ہے، سہولت نہیں۔