خراب موسم، تکنیکی جانچ اور فضائی حدود کی بندش کے باعث 4 بین الاقوامی سمیت ایئر انڈیا کی 8 پروازیں منسوخ

نئی دہلی: ایئر انڈیا نے جمعہ کو چار بین الاقوامی اور چار گھریلو پروازیں منسوخ کرنے کا اعلان کیا ہے۔ کمپنی نے اس فیصلے کی وجوہات میں طیاروں کی مرمت، خراب موسم، فضائی حدود پر عارضی پابندیاں اور آپریشنل مسائل کو قرار دیا ہے۔ ایئرلائن کی جانب سے کہا گیا ہے کہ متاثرہ مسافروں کے لیے متبادل انتظامات کی کوشش کی جا رہی ہے تاکہ وہ اپنی منزل تک جلد پہنچ سکیں۔

منسوخ کی جانے والی بین الاقوامی پروازوں میں دبئی سے چنئی (AI-906)، دہلی سے میلبورن (AI-308)، میلبورن سے دہلی (AI-309) اور دبئی سے حیدرآباد (AI-2204) شامل ہیں۔ جبکہ گھریلو پروازوں میں پونے سے دہلی (AI-874)، احمد آباد سے دہلی (AI-456)، حیدرآباد سے ممبئی (AI-2872) اور چنئی سے ممبئی (AI-571) شامل ہیں۔

ایئر انڈیا نے اعلان کیا ہے کہ مسافروں کو پرواز کی منسوخی کی صورت میں مکمل رقم کی واپسی یا متبادل تاریخوں میں نئی بکنگ کی سہولت فراہم کی جائے گی۔ کمپنی نے مشورہ دیا ہے کہ مسافر اپنی پرواز کی موجودہ صورتحال ایئرلائن کی ویب سائٹ پر چیک کریں یا کسٹمر کیئر نمبروں 011-69329333 اور 011-69329999 پر رابطہ کریں۔

یہ فیصلہ ایک ایسے وقت پر آیا ہے جب ایئر انڈیا نے گزشتہ روز بھی اعلان کیا تھا کہ 21 جون سے 15 جولائی کے درمیان 16 بین الاقوامی راستوں پر پروازوں کی تعداد کم کی جائے گی اور تین غیر ملکی مقامات پر پروازیں عارضی طور پر معطل رہیں گی۔

یاد رہے کہ 12 جون کو ایک خطرناک طیارہ حادثہ پیش آیا تھا جس میں 241 مسافر اور تقریباً 29 زمینی عملہ ہلاک ہو گئے تھے۔ اس واقعہ کے بعد ایئر انڈیا نے حفاظتی اقدامات کے تحت طیاروں کی سخت جانچ شروع کی ہے، جس کے سبب پروازیں متاثر ہو رہی ہیں۔

ایئر لائن نے کہا ہے کہ وہ 21 جون سے ہر ہفتے 38 بین الاقوامی پروازیں کم کرے گی۔ دہلی- نیروبی، امرتسر- لندن گیٹوک اور گوا- لندن گیٹوک جیسے روٹس پر پروازیں معطل کر دی گئی ہیں۔ شمالی امریکہ، یورپ، آسٹریلیا اور مشرق بعید کے شہروں کے لیے بھی کئی بین الاقوامی پروازیں متاثر ہوں گی۔ ایئر انڈیا کا کہنا ہے کہ یہ تمام اقدامات مسافروں کی حفاظت اور بہتر سروس فراہم کرنے کے لیے کیے جا رہے ہیں۔