شام اور ترکیہ کے بعد چین اور تاجکستان میں بھی آئے زلزلے، افغانستان تک محسوس کئے گئے جھٹکے

شام اور ترکیہ کے بعد اب چین میں 7.3 اور مشرقی تاجکستان میں 6.8 شدت کا زلزلہ آیا ہے۔ امریکی جیولوجیکل سروے نے دونوں ممالک میں زلزلے کے جھٹکوں کی تصدیق کی ہے

زلزلہ، علامتی تصویر یو این آئی
زلزلہ، علامتی تصویر یو این آئی
user

قومی آوازبیورو

شام اور ترکیہ میں زلزلے کے سانحہ کے درمیان چین اور تاجکستان کی سرحد پر آج صبح 7.3 شدت کے زلزلے کے جھٹکے محسوس کیے گئے۔ چین میں جمعرات (23 فروری) کی رات تقریباً 8:37 بجے سنکیانگ میں 7.3 اور مشرقی تاجکستان میں 6.8 شدت کے زلزلے کے جھٹکے محسوس کیے گئے۔

چین کے ارتھ کوئیک نیٹ ورک سینٹر (سی ای این سی) نے اوئغر خود مختار علاقے میں زلزلے کی تصدیق کی ہے جبکہ امریکی جیولوجیکل سروے نے تاجکستان میں ان جھٹکوں کے بارے میں بتایا ہے۔ اتنی زیادہ شدت کے زلزلے کے بعد وہاں کی صورتحال کے بارے میں مزید معلومات کا انتظار کیا جا رہا ہے۔


یو ایس جی ایس کے اندازوں کے مطابق تاجکستان میں جس علاقے میں زلزلہ آیا وہ پامیر کی بڑی چوٹیوں سے گھرا ہوا ہے۔ ایسی صورت حال میں وہاں لینڈ سلائیڈنگ بھی ہو سکتی ہے لیکن اس سے جان و مال کا نقصان نہیں ہونا چاہیے کیونکہ اس علاقے میں آبادی بہت کم ہے۔ تاہم ابھی تک چین کی صورتحال کے بارے میں کوئی واضح معلومات موصول نہیں ہوئی ہیں۔

خیال رہے کہ گزشتہ ہفتوں میں ترکیہ میں 7.8 شدت کے زلزلے اور اس کے آفٹر شاکس سے جان گنوانے والوں کی تعداد 41 ہزار سے تجاوز کر گئی ہے۔ اس کے علاوہ شام میں اس سانحہ میں کل 5800 افراد ہلاک ہوئے ہیں، یعنی اس علاقے میں اس آفت سے 45 ہزار سے زیادہ افراد کو لقمہ اجل بنا دیا ہے۔ ۔ ماہرین کا کہنا ہے کہ آنے والے دنوں میں مرنے والوں کی تعداد 50 ہزار سے زیادہ ہو سکتی ہے کیونکہ ان اعداد و شمار میں شدید زخمیوں کا ذکر نہیں ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔