سچن کے بعد انل امبانی، جیکی شروف اور نیرا راڈیا سمیت متعدد دافراد کے نام پنڈورا پیپرز میں شامل!

تحقیقاتی صحافیوں کے بین الاقوامی کنسورٹیم (آئی سی جے آئی) میں بی بی سی اور دی گارجین کے علاوہ ہندوستان کے انڈین ایکسپریس سمیت دنیا بھر کے 150 سے زائد میڈیا گروپ شامل ہیں۔

تصویر ٹوئٹر
تصویر ٹوئٹر
user

قومی آوازبیورو

نئی دہلی: بین الاقوامی کنسورٹیم آف انویسٹی گیٹو جرنلسٹس (آئی سی آئی جے) کے پنڈورا پیپرز کے انکشافات نے کھلبلی پیدا کر دی ہے۔ پنڈورا پیپرز لیکس میں ہندوستانی کرکٹ میں ماسٹر بلاسٹر کے نام سے مشہور سچن تندولکر کا نام بھی سامنے آیا ہے۔ آج تک پر شائع رپورٹ کے مطابق، اب کئی ہندوستانیوں بشمول انل امبانی، ونود اڈانی، جیکی شروف، کرن مجومدرا شا، نیرا راڈیا اور ستیش شرما کے نام منظر عام پر آئے ہیں۔

تحقیقاتی صحافیوں کے بین الاقوامی کنسورٹیم (آئی سی جے آئی) میں بی بی سی اور دی گارجین کے علاوہ ہندوستان کے انڈین ایکسپریس سمیت دنیا بھر کے 150 سے زائد میڈیا گروپ شامل ہیں۔ آئی سی آئی جے نے دعویٰ کیا ہے کہ اسے 1.19 کروڑ سے زائد خفیہ فائلیں حاصل ہوئی ہیں، جس میں امیروں کے خفیہ لین دین کو بے نقاب کیا ہے۔


رپورٹ کے مطابق پنڈورا پیپرز کی فہرست میں بائیوکون کی سربراہ کرن مجومدار شا کے شوہر جان شا کا نام بھی سامنے آیا ہے۔ اس پر کرن نے کہا کہ ان کے شوہر کے غیر ملکی ٹرسٹ کو غلط طریقے سے شامل کیا گیا ہے۔ انہون نے کہا کہ ان کے شوہر کا ٹرسٹ حقیقی اور درست ہے۔

پنڈورا پیپرز کی فہرست میں بائیوکون سربراہ کے شوہر کا نام شامل ہونے پر کرن مجومدار شا نے واضح کیا، "میرے شوہر کے غیرملکی ٹرسٹ کا نام غلط طریقے سے شامل کیا جا رہا ہے، جو کہ ایک حقیقی اور درست ہے، جس کا انتظام ایک آزاد ٹرسٹی کرتا ہے۔ کسی بھی ہندوستانی کے پاس اس ٹرسٹ کی کلید نہیں ہے، جیسا کہ الزام لگایا گیا ہے۔


خیال رہے کہ پنڈورا پیپرز لیک میں تقریباً 380 ہندوستانیوں کے نام شامل ہونے کا دعویٰ کیا جا رہا ہے۔ اس میں سچن تندولکر کا نام بھی شامل ہے۔ اس حوالے سے تندولکر کے وکیل کا کہنا ہے کہ ان کی سرمایہ کاری جائز ہے اور ٹیکس افسران کو اس کا علم ہے۔ اس کے ساتھ ہی انل امبانی اور کرن مجومدار شا کو بھی غیر اعلانیہ غیر ملکی اثاثے رکھنے کے الزام میں اس فہرست میں شامل کیا گیا ہے۔ مفرور ہیرا تاجر نیرو مودی کا نام بھی اس فہرست میں شامل ہے۔

پنڈورا پیپرز کے سامنے آنے کے بعد 91 ممالک میں ہلچل مچ گئی ہے۔ اس فہرست میں دنیا بھر کے سیاستدانوں اور مشہور شخصیات پر دوسرے ممالک میں خفیہ طریقہ سے دولت کمانے کا الزام لگایا گیا ہے۔ آئی سی آئی جے کا دعویٰ ہے کہ اسے 1.19 کروڑ سے زائد خفیہ فائلیں ملی ہیں، جس نے امیروں کے خفیہ لین دین کو بے نقاب کیا ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔