ہندوستان میں 43 برس سے مقیم دو بزرگ بہنیں پاکستان واپسی کے دہانے پر

اٹاری سرحد پر ایک جذباتی لمحہ اس وقت سامنے آیا جب جموں و کشمیر کے راجوری ضلع میں گزشتہ 43 برس سے رہنے والی دو بزرگ بہنوں کو وطن واپسی کے سفر پر روانہ کرنے کی تیاری کی گئی۔ سیدہ ضمیر فاطمہ (67) اور سیدہ صغیر فاطمہ (64) سن 1983 میں اپنے والد کے ساتھ پاکستان سے ہندوستان آئی تھیں، اور تب سے وہ یہاں مقیم تھیں۔

ان کے والد کا کئی برس قبل انتقال ہو چکا ہے اور اب پاکستان میں ان کا کوئی قریبی رشتہ دار بھی زندہ نہیں ہے۔ برسوں سے ان کا سارا وقت، ساری یادیں اور ساری زندگی ہندوستان میں ہی گزری ہے۔

ان دونوں بہنوں کو اٹاری-واگھہ بارڈر تک چھوڑنے کے لیے ان کے قریبی رشتہ دار ایم ایچ شاہ موجود تھے، جو ان لمحوں کو بیان کرتے ہوئے آبدیدہ ہو گئے۔ انہوں نے کہا، ’’یہ بہنیں جوانی میں یہاں آئی تھیں، ان کی پوری عمر یہاں گزر گئی۔ اب یہ کہاں جائیں گی؟ کس کے پاس جائیں گی؟‘‘

شاہ نے بتایا کہ ان دونوں بزرگ خواتین نے ہندوستانی شہریت کے لیے درخواست بھی دی تھی اور تمام سرکاری فیس بھی جمع کروائی گئی تھی، مگر کئی برس گزر جانے کے باوجود کوئی پیش رفت نہ ہو سکی۔

انہوں نے کہا، ’’یہ اب اپنی عمر کے اس حصے میں ہیں جہاں انہیں سہارے کی ضرورت ہے، یہ کسی سہارے کے بغیر پاکستان جا رہی ہیں، جہاں ان کا اب کوئی نہیں بچا۔‘‘

ذرائع کے مطابق، حکومت ہند کے حالیہ فیصلے کے تحت ایسے تمام پاکستانی نژاد افراد کو جو مستقل ویزا پر یہاں رہ رہے تھے، وطن واپس بھیجنے کا عمل جاری ہے۔ بتایا گیا ہے کہ پہلگام میں پیش آنے والے واقعے کے بعد حکومت نے سخت رویہ اختیار کرتے ہوئے کارروائی تیز کر دی ہے۔

اب تک ہزاروں پاکستانی شہری ہندوستان چھوڑ چکے ہیں اور ان دونوں بہنوں کا نام بھی اسی فہرست میں شامل ہے۔ ان کے رشتہ داروں کے مطابق وہ بہت پریشان ہیں اور اس وقت مکمل طور پر دوسروں کے سہارے پر ہیں۔