اتراکھنڈ کی سبھی 70 اسمبلی سیٹوں پر عآپ کھڑا کرے گی امیدوار، کیجریوال کا اعلان

عام آدمی پارٹی (عآپ) نے اتراکھنڈ کی سبھی 70 اسمبلی سیٹوں پر امیدوار کھڑا کرنے کا اعلان کر دیا ہے۔ گوا اور پنجاب کے بعد اب عآپ کا ارادہ اتراکھنڈ میں پیر جمانے کا ہے اور اسی لیے دہلی کے وزیر اعلیٰ اروند کیجریوال نے اعلان کیا ہے کہ ان کی پارٹی آئندہ اسمبلی انتخاب میں اتراکھنڈ کی سبھی اسمبلی سیٹوں پر امیدوار کھڑے کرے گی۔ کیجریوال نے بتایا کہ ان کی پارٹی نے اتراکھنڈ میں ایک سروے کرایا تھا جس سے عوام کی زبردست حمایت ملنے کی امید ظاہر ہوئی ہے۔

عآپ سربراہ اروند کیجریوال نے خبر رساں ادارہ اے این آئی سے بات چیت کرتے ہوئے اس سلسلے میں بتایا کہ "پہلے ہم اتراکھنڈ میں الیکشن لڑنے سے متعلق واضح ارادہ نہیں کر پائے تھے، اس لیے ہم نے وہاں ایک سروے کرایا۔ سروے میں 62 فیصد لوگوں نے کہا کہ ہمیں اتراکھنڈ میں الیکشن لڑنے کا فیصلہ کرنا چاہیے۔" کیجریوال نے مزید کہا کہ اتراکھنڈ میں بے روزگاری، تعلیم اور صحت سے متعلق بنیادی مسائل ہمارے اہم انتخابی ایشوز ہوں گے۔

اتراکھنڈ میں عآپ کی موجودگی کے تعلق سے کیجریوال نے بتایا کہ وہاں فی الحال تنظیم کا کوئی بڑا نیٹورک نہیں ہے، لیکن انتخاب عوام کی امید سے لڑے جاتے ہیں، تنظیم سے نہیں۔ عوام کی امیدیں ساتھ ہوں اور لیڈروں کی نیت ٹھیک ہو تو تنظیم بننے میں دیر نہیں لگتی۔ انھوں نے مزید کہا کہ شروعاتی دنوں میں دہلی میں بھی عآپ کے پاس کوئی بڑی تنظیم نہیں تھی، لیکن پارٹی بننے کے دو سال کے اندر ہی عآپ نے ثابت کیا کہ وہ کمزور نہیں ہے۔

کیجریوال کا کہنا ہے کہ اتراکھنڈ کے لوگوں نے دہلی کی ترقی کو نزدیک سے دیکھا ہے۔ دہلی میں رہنے والے اتراکھنڈی یہاں کے اسکولوں کی ترقی، تعلیم اور صحت کے شعبہ میں ہوئی تبدیلی کو بھی دیکھا ہے اور وہ ضرور اتراکھنڈ میں بھی عآپ کو حمایت کریں گے۔