عآپ رکن اسمبلی موہنیا پر ’پانی کی کالابازاری‘ کا الزام، ہائی کورٹ نے لوک آیُکت کو 4 ہفتہ میں معاملہ نمٹانے کا دیا حکم

نئی دہلی: دہلی ہائی کورٹ نے سنگم وِہار سے عآپ رکن اسمبلی دنیش موہنیا کے خلاف علاقہ میں پانی کی کالابازاری کر بدعنوانی کرنے کے ضمن میں درج شکایت کو 4 ہفتہ میں نمٹانے کا حکم لوک آیُکت کو دیا ہے۔ دہلی ہائی کورٹ کے چیف جسٹس منموہن اور جسس تشار راؤ گیڈیلا کی بنچ نے یہ حکم پاس کیا ہے۔

انسداد بدعنوانی فورم کے قومی صدر کرشن گوپال گپتا نے تقریباً 4 سال قبل لوک آیُکت کو دہلی جَل بورڈ کے نائب صدر اور سنگم وِہار کے رکن اسمبلی دنیش موہنیا کے خلاف علاقے کے لوگوں کے ساتھ پانی کی فراہمی کرنے کے بدلے وصولی کرنے کی شکایت درج کرائی تھی۔ شکایت میں الزام لگایا گیا تھا کہ دہلی حکومت کے ذریعہ علاقے میں لگائے گئے بورویل پر رکن اسمبلی کے لوگوں نے ناجائز قبضہ جمایا ہوا ہے اور جو شخص انھیں پیسے دیتا ہے اسی کو پانی دیا جاتا ہے۔

کرشن گوپال گپتا نے بتایا کہ انسداد بدعنوانی فورم نے لوک آیُکت کو تمام ویڈیو ثبوت بھی دستیاب کرائے تھے جس میں رکن اسمبلی اور ان کے ساتھیوں کا شامل ہونا اس معاملے میں واضح نظر آ رہا تھا۔ علاقہ کے لوگوں نے کیمرے پر رکن اسمبلی اور ان کے لوگوں پر پانی کے بدلے وصولی کے سنگین الزام عائد کیے تھے۔ انھوں نے مزید کہا کہ فورم کے وکیل اشوک کمار نے لوک آیُکت کے سامنے کئی دیگر دستاویزی ثبوت بھی پیش کیے تھے، لیکن گزشتہ 4 سالوں میں شکایت پر کوئی پختہ کارروائی نہیں ہوئی بلکہ کارروائی کی جگہ لگاتار تاریخ ہی دی جا رہی تھی۔ شکایت میں نمٹارے سے متعلق ہو رہی تاخیر کو دیکھتے ہوئے فورم نے ہائی کورٹ کا رخ کیا جہاں سے 4 ہفتہ میں معاملہ کو نمٹانے کا حکم ہوا ہے۔