عآپ رکن اسمبلی نریش بالیان گرفتار، گینگسٹر کے ساتھ آڈیو کلپ وائرل ہونے کے بعد ہوئی کارروائی

دہلی پولیس کی کرائم برانچ نے عام آدمی پارٹی کے رکن اسمبلی نریش بالیان کو جبرن وصولی کے معاملے میں حراست میں لیا ہے۔ تفتیش میں بالیان اور بدنام زمانہ گینگسٹر کپل سانگوان کے درمیان ہونے والی بات چیت کا آڈیو کلپ سامنے آنے کے بعد یہ گرفتاری عمل میں آئی ہے ۔ اطلاعات کے مطابق مبینہ  بات چیت میں تاجروں سے تاوان کی رقم وصول کرنے پر بات چیت ہوئی اس معاملے میں مزید تفتیش جاری ہے۔

30 نومبر کو، بی جے پی نے الزام لگایا تھا کہ دہلی میں حکمراں جماعت کا ایک ایم ایل اے ایک غنڈہ کی مدد سے رقم وصولی میں ملوث ہے۔ بی جے پی کے قومی ترجمان گورو بھاٹیہ اور پارٹی کی دہلی یونٹ کے صدر وریندر سچدیوا نے صحافیوں سے خطاب کرتے ہوئے عآپ  رکن اسمبلی کی گینگسٹر کے ساتھ مبینہ بات چیت کا ایک آڈیو کلپ بھی چلایا تھا۔

گورو بھاٹیہ نے پریس کانفرنس کے دوران الزام لگایا کہ عآپ رکن اسمبلی  لوگوں کو دھمکیاں دینے اور ان سے پیسے بٹورنے میں ملوث ہے۔ انہوں نے سوال کیا کہ کیا کیجریوال اور دہلی کے وزیر اعلیٰ آتشی ایم ایل اے کے خلاف کارروائی کریں گے اور ان سے استعفیٰ دینے کو کہیں گے؟ انہوں نے کہا کہ اگر وہ رکن  اسمبلی سے استعفیٰ نہیں لیتے ہیں تو یہ سمجھا جائے گا کہ  وصولی کی جانے والی رقم پارٹی اور اس کے لیڈروں کو جا رہی ہے۔

تاہم عام آدمی پارٹی کے سینئر رہنما اور راجیہ سبھا کے رکن سنجے سنگھ نے بی جے پی کے الزامات کو مسترد کرتے ہوئے دعویٰ کیا کہ یہ آڈیو کلپ فرضی ہے۔ انہوں نے کہا کہ اروند کیجریوال دہلی میں امن و امان کی بگڑتی ہوئی صورتحال اور بڑھتے ہوئے جرائم کے خلاف آواز اٹھا رہے ہیں۔ ان جرائم کو روکنے کے بجائے بی جے پی اور امت شاہ کیجریوال کو روکنے کی کوشش کر رہے ہیں۔ ہمارے رہنما کو روکنے کے لیے اب وہ جعلی آڈیو کلپ چلا رہے ہیں۔