اندور واقع نرمدا پائپ لائن میں اچانک ہوا دھماکہ، 150 فیٹ اونچائی تک پہنچی پانی کی دھار، تباہی جیسے حالات پیدا

مدھیہ پردیش کے اندور-مہو واقع بھیرو گھاٹ علاقہ میں گزشتہ 31 مئی کو ’نرمدا واٹر سپلائی پروجیکٹ‘ کی ایک بڑی پائپ لائن پھٹ جانے کا معاملہ پیش آیا تھا، جس کے بعد مقامی لوگوں کو کئی طرح کے مسائل کا سامنا کرنا پڑ رہا ہے۔ بتایا جا رہا ہے کہ پائپ لائن ایک دھماکہ کے ساتھ پھٹ گیا اور پھر اس کے بعد لاکھوں لیٹر پانی بہہ کر برباد ہو گیا۔ پائپ لائن پھٹنے کے بعد علاقہ میں افرا تفری کا ماحول پیدا ہو گیا اور لوگ محفوظ مقامات کی طرف بھاگتے نظر آئے۔

عینی شاہدین کا کہنا ہے کہ پائپ لائن اچانک زوردار دھماکہ کے ساتھ پھٹ گئی اور پانی کا فوارہ تقریباً 150 فیٹ تک اوپر اچھلنے لگا۔ دیکھتے ہی دیکھتے پورا علاقہ پانی سے بھر گیا اور بھیرو گھاٹ میں پانی کی تباہی جیسے حالات بن گئے۔ واقعہ کے بعد تیز رفتار سے بہتا ہوا پانی آس پاس کے رہائشی علاقوں تک پہنچ گیا۔ کئی گھروں کے باہر اور گلیوں میں پانی بھر گیا، جس سے مقامی لوگوں میں دہشت پھیل گئی۔ لوگوں کا کہنا ہے کہ انھوں نے پہلے کبھی اس طرح کا نظارہ نہیں دیکھا تھا۔ پائپ لائن سے نکل رہا پانی اتنی تیز رفتاری سے بہہ رہا تھا کہ آس پاس موجود لوگ محفوظ مقامات کی طرف جانے لگے۔

مقامی باشندوں نے الزام عائد کیا کہ پائپ لائن پھٹنے کے بعد طویل وقت تک پانی لگاتار بہتا رہا، لیکن متعلقہ محکمہ کے ذمہ دار ملازمین موقع پر نہیں پہنچے۔ لوگوں کا یہ بھی کہنا ہے کہ اگر فوری کارروائی کی جاتی تو بڑی مقدار میں پانی ضائع نہیں ہوتا، اور آس پاس کے علاقوں کی حالت بھی خراب نہیں ہوتی۔

موصولہ اطلاع کے مطابق یہ پائپ لائن اندور شہر کو نرمدا کا پانی دستیاب کرانے والی اہم لائن کا حصہ ہے۔ اس پائپ لائن کے پھٹنے سے نہ صرف پانی کی بربادی ہوئی ہے، بلکہ شہر کے کئی علاقوں میں پانی کی فراہمی متاثر ہونے کا اندیشہ بھی بڑھ گیا ہے۔ افسران کو اب پائپ لائن کی مرمت اور پانی فراہمی کے انتظام کو معمول پر لانے سے متعلق چیلنج کا سامنا کرنا پڑ رہا ہے۔

فی الحال متعلقہ محکمہ کی ٹیم پائپ لائن کے نقصان کا اندازہ کرنے اور مرمت کے کام میں مصروف ہے۔ انتظامیہ کا کہنا ہے کہ جلد از جلد پائپ لائن کو درست کر پانی کی فراہمی معمول پر لانے کی کوشش کی جا رہی ہے۔ حالانکہ واقعہ کے بعد اندور کے کئی علاقوں میں پانی کی دستیابی کو لے کر فکر بڑھ گئی ہے اور لوگوں کو پانی کے بحران کا اندیشہ پریشان کر رہا ہے۔