جموں کے ایک وکیل اور کشمیر کی ایک خاتون کورونا سے ہلاک، لوگ دہشت زدہ

جموں و کشمیر میں کورونا سے ہلاک ہونے والوں کی مجموعی تعداد 23 پہنچ گئی ہے اور لگاتار کورونا انفیکشن کے بڑھتے معاملات کے سبب لوگوں میں خوف کا ماحول دیکھنے کو مل رہا ہے۔

کورونا وائرس
کورونا وائرس
user

یو این آئی

سری نگر: جموں سے تعلق رکھنے والے ایک وکیل اور جنوبی کشمیر کے ضلع کولگام کی ایک خاتون کی موت کے بعد کورونا ٹیسٹ مثبت آنے سے جموں و کشمیر یونین ٹریٹری میں اس وائرس سے مرنے والوں کی تعداد بڑھ کر 23 ہوگئی ہے۔ ان ہلاکتوں کے بعد لوگوں میں ایک دہشت کا ماحول بھی دیکھنے کو مل رہا ہے۔

آچاریہ شری چندرا کالج آف میڈیکل سائنسز سدھرا جموں کے میڈیکل سپر انٹنڈنٹ ڈاکٹر رویندر رتن پال نے ایک مقامی خبر رساں ادرے کو بتایا کہ ترکوٹہ نگر جموں سے تعلق رکھنے والے 63 سالہ وکیل کا ہسپتال میں موت کے بعد کورونا ٹیسٹ مثبت آیا ہے۔ انہوں نے بتایا کہ متوفی وکیل کے نمونے چند دن قبل لئے گئے تھے اور اتوار کی شام دیر گئے ان کا ٹیسٹ رپورٹ مثبت آیا۔


جنوبی کشمیر کے ضلع کولگام کے بوگام سے تعلق رکھنے والی ایک 65 سالہ خاتون کی کورونا سے موت واقع ہوئی ہے۔ گورنمنٹ میڈیکل کالج سری نگر میں کووڈ 19 کے نوڈل افسر ڈاکٹر سلیم خان نے بتایا کہ بوگام کولگام سے تعلق رکھنے والی ایک خاتون کو شری مہاراجہ ہری سنگھ ہسپتال سری نگر میں 22 مئی کو داخل کیا گیا تھا جہاں اس کی اگلے روز موت واقع ہوئی۔ انہوں نے بتایا کہ متوفی خاتون کے کورونا ٹیسٹ کے لئے نمونے لئے گئے تھے اور اس کی لاش کو جی ایم سی کے لاش گھر میں رکھا گیا تھا۔ موصوف ڈاکٹر نے بتایا کہ متوفی خاتون کا کورونا ٹیسٹ پیر کے روز مثبت آیا۔

ترکوٹہ نگر جموں اور کولگام کشمیر سے تعلق رکھنے والے ان دو افراد کی موت کے ساتھ جموں و کشمیر میں کورونا سے مرنے والوں کی مجموعی تعداد 23 ہوگئی ہے۔ جن میں سے 20 کا تعلق کشمیر سے ہے جبکہ 3 جموں کے رہنے والے ہیں۔ وادی میں کورونا سے اب تک ضلع سری نگر میں سب سے زیادہ اموات واقع ہوئی ہیں جہاں 6 افراد اس جان لیوا وائرس کی وجہ سے موت کی آغوش میں چلے گئے ہیں۔ ضلع اننت ناگ اور بارہمولہ میں چار چار جبکہ کولگام میں تین، بڈگام میں دو اور بانڈی پورہ میں ایک مریض کی کورونا سے موت واقع ہوئی ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔