پونے-بنگلورو شاہراہ پر دردناک حادثہ، بس اور کنٹینر کی ٹکر کے بعد لگی خوفناک آگ، 8 افراد کی زندہ جلنے سے موت

مہاراشٹر میں پونے-بنگلورو شاہراہ پر جمعرات کی دیر شام ایک دردناک حادثہ پیش آیا جس میں کم از کم 8 افراد جاں بحق ہو گئے ہیں۔ یہ حادثہ نولے برج کے پاس پیش آیا، جہاں 2 کنٹینر، ایک منی بس اور 3 سے 4 کاریں آپس میں ٹکرا گئیں۔ تقریباً 7 گاڑیوں کی شدید ٹکر کے سبب آگ لگ گئی، جس سے موقع پر چیخ و پکار اور افرا تفری کا ماحول پیدا ہو گیا۔

میڈیا رپورٹس کے مطابق اس حادثہ میں 8 لوگوں کی موت زندہ جلنے کی وجہ سے ہوئی ہے، جبکہ کچھ دیگر افراد زخمی ہوئے ہیں۔ زخمیوں کو فوری طور پر قریبی اسپتال میں علاج کے لیے داخل کرایا گیا۔ اس حادثہ کی جانکاری ملتے ہی پونے فائر بریگیڈ کی کئی ٹیمیں جائے وقوع پر پہنچیں اور آگ پر قابو پانے کی کوششیں شروع کر دیں۔ حادثہ شام میں اس وقت ہوا جب سڑک پر ٹریفک زیادہ ہوتا ہے۔ یہی وجہ ہے کہ پونے-بنگلورو شاہراہ پر لمبا جام لگ گیا۔ پولیس اور فائر بریگیڈ کی ٹیمیں راحت و بچاؤکاری کے عمل میں مصروف ہیں۔ مہلوکین کی شناخت بھی کی جا رہی ہے۔

حادثہ کے بارے میں بتایا جاتا ہے کہ یہ اتنا شدید تھا کہ کچھ گاڑیوں کے پرخچے اڑ گئے۔ کچھ لوگ گاڑیوں کے اندر ہی پھنس گئے، جنھیں زخمی حالت میں بمشکل نکالا جا سکا۔ بچاؤ ٹیم نے سخت مشقت کے بعد آگ پر قابو پایا اور پھنسے ہوئے لوگوں کو گاڑیوں سے باہر نکالا۔ زخمیوں کو قریب کے سسون اور نولے اسپتال میں داخل کرایا گیا ہے۔

حادثہ میں ہلاک ہونے والوں کی شناخت فی الحال نہیں ہو سکی ہے۔ جائے وقوع پر موجود پولیس نے کہا کہ گاڑی ڈرائیورس کی لاپروائی یا بریک فیل ہونے کی وجہ سے حادثہ ہونے کا امکان ہے۔ موقع پر موجود لوگوں کا کہنا ہے کہ 2 کنٹینر، ایک بس اور 4 کاریں آپس میں ٹکرا گئیں، جس کے بعد آگ لگ گئی۔ آگ اتنی شدید تھی کہ اونچی اونچی لپٹیں اٹھنے لگیں۔ خوفناک آگ کو دیکھ کر وہاں موجود لوگ ڈر گئے اور فوری طور پر انفرادی مدد نہیں پہنچا سکے۔

پونے فائر بریگیڈ نے 8 لاشیں برآمد ہونے کی تصدیق کی ہے۔ جلتی گاڑیوں میں مزید لوگوں کے پھنسے ہونے کا اندیشہ بھی ظاہر کیا گیا ہے۔ اس صورت میں مہلوکین کی تعداد بڑھ سکتی ہے۔ موقع پر موجود ایک پولیس افسر نے بتایا کہ حادثہ کی وجہ سے متعلق جانچ کی جا رہی ہے۔