بھوپال کے جنگل سے 52 کلو سونا اور 15 کروڑ کیش برآمد، انکم ٹیکس ریڈ میں انکشاف

بھوپال: مدھیہ پردیش کی راجدھانی بھوپال میں انکم ٹیکس (آئی ٹی) ڈیپارٹمنٹ نے ایک بڑی کارروائی کے دوران جنگل میں کھڑی ایک کار سے 52 کلوگرام سونا اور 15 کروڑ روپے نقدی برآمد کیے ہیں۔ یہ انکشاف آئی ٹی اور پولیس کے مشترکہ آپریشن کے دوران ہوا، جس میں 100 سے زائد پولیس اہلکار شامل تھے۔

آج تک نے ذرائع کے حوالہ سے رپورٹ کیا کہ یہ کارروائی بھوپال کے قریب مینڈوری کے جنگلاتی علاقے میں کی گئی۔ دوران تفتیش کار سے بڑی مقدار میں سونا اور نقدی ملی، جس نے محکمہ انکم ٹیکس کے افسران کو حیرت میں ڈال دیا۔ تمام نقدی اور سونے کو ضبط کر لیا گیا ہے اور مزید تحقیقات جاری ہیں۔

بتایا جا رہا ہے کہ یہ چھاپہ بھوپال اور اندور کی ایک معروف تعمیراتی کمپنی پر ٹیکس چوری اور غیر قانونی سرگرمیوں میں ملوث ہونے کے شبہ کے تحت مارا گیا۔ اس سے قبل محکمہ نے مذکورہ کمپنی کے 51 مختلف ٹھکانوں پر بھی چھاپے مارے تھے۔

محکمہ کے حکام نے تصدیق کی ہے کہ جنگل سے برآمد شدہ نقدی اور سونا ایک بڑی سازش کا حصہ ہو سکتا ہے۔ افسران یہ جانچنے کی کوشش کر رہے ہیں کہ اتنی بڑی مقدار میں دولت کہاں سے آئی اور اسے کس مقصد کے لیے استعمال کیا جانا تھا۔ یہ انکشاف ریاست میں ہلچل پیدا کرنے کا باعث بنا ہے، جبکہ افسران اس معاملے کی مزید باریک بینی سے تحقیقات کر رہے ہیں۔