’5 سالوں میں گجرات سے 40 ہزار خواتین لاپتہ ہوئیں‘، شیوسینا کا وزیر اعظم مودی اور وزیر داخلہ امت شاہ پر حملہ

این سی آر بی ڈاٹا پیش کرتے ہوئے ’سامنا‘ میں لکھا گیا ہے ’’ایسا ماحول بنایا گیا ہے کہ پی ایم مودی کی ریاست جنت ہے، لیکن خواتین کے غائب ہونے کے اعداد و شمار نے ریاست کی سیاہ حقیقت کو ظاہر کر دیا ہے۔‘‘

سامنا تصویر ٹوئٹر Saamana@SaamanaOnline
سامنا تصویر ٹوئٹر Saamana@SaamanaOnline
user

قومی آوازبیورو

ادھو ٹھاکرے کی قیادت والی شیوسینا نے وزیر اعظم نریندر مودی اور مرکزی وزیر داخلہ امت شاہ کو گجرات سے لاپتہ ہوئیں ہزاروں خواتین معاملے پر تنقید کا نشانہ بنایا ہے۔ شیوسینا (یو بی ٹی) نے پی ایم مودی اور امت شاہ کو قومی کرائم ریکارڈ بیورو کا ڈاٹا یاد دلایا اور کہا کہ گزشتہ پانچ سالوں میں گجرات سے تقریباً 40 ہزار خواتین لاپتہ ہوئی ہیں۔

گجرات سے لاپتہ ہوئیں ہزاروں خواتین کی سچائی شیوسینا کے رسالہ ’سامنا‘ میں پیش کی گئی ہے۔ دلچسپ بات یہ ہے کہ مہاراشٹر کی مقامی میڈیا نے مہاراشٹر میں بھی گمشدہ خواتین کا معاملہ شندے-فڑنویس حکومت کے سامنے اٹھایا ہے۔ مہاراشٹر کی میڈیا نے مہاراشٹر سے غائب ہوئی خواتین کے معاملے میں شندے-فڑنویس کو گھیرتے ہوئے کہا کہ پولیس کو ان گمشدہ خواتین کی تلاش میں نہ لگا کر ریاست کی سیاست سے جڑے کاموں میں لگایا جا رہا ہے۔ ’سامنا‘ کے اداریہ میں مہاراشٹر حکومت کو نشانے پر لیتے ہوئے دعویٰ کیا گیا ہے کہ ریاست سے روزانہ تقریباً 70 خواتین غائب ہوتی ہیں۔ گزشتہ تین مہینوں میں ہی ریاست سے تقریباً 5500 خواتین لاپتہ ہو گئی ہیں۔


قابل ذکر ہے کہ گجرات پولیس نے پیر کے روز سلسلہ وار ٹوئٹ کیا تھا جس میں بتایا تھا کہ 2016 سے 2020 تک تقریباً 41621 خواتین کے غائب ہونے کی خبر ملی تھی، جس میں سے گجرات پولیس نے 39497 خواتین کا پتہ لگا کر انھیں ان کے گھر والوں کے پاس بھیج دیا ہے۔ خواتین کے گمشدہ ہونے سے متعلق نیشنل کرائم ریکارڈ بیورو (این سی آر بی) کی جو رپورٹ ہے، اس نے گجرات حکومت کی خامیوں کو ظاہر کیا ہے۔ اعداد و شمار کے مطابق تقریباً 40 ہزار خواتین گزشتہ پانچ سالوں میں ریاست سے غائب ہوئی ہیں۔

این سی آر بی کے اعداد و شمار کا حوالہ پیش کرتے ہوئے ’سامنا‘ میں لکھا گیا ہے کہ ’’ہندوستان میں مہم چلائی گئی کہ گجرات ملک کی ترقی میں پیش پیش رہنے والی تنہا ریاست ہے۔ بیرون ملکی لیڈروں کو دہلی اور ممبئی سے پہلے اب گجرات لے جایا جاتا ہے۔ ایسا ماحول بنایا گیا ہے کہ پی ایم مودی کی ریاست جنت ہے، لیکن خواتین کے غائب ہونے کے اعداد و شمار نے ریاست کی سیاہ حقیقت کو ظاہر کر دیا ہے۔‘‘ ساتھ ہی یہ بھی لکھا گیا ہے کہ ’’اگر سبھی ترقی مودی اور شاہ کی دیکھ ریکھ میں ہو رہی ہے تو غائب ہوئی خواتین کی تلاش کون کرے گا؟‘‘

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔