لوگوں پر ٹوٹا طوفان، بارش، بجلی کا قہر، 40 ہلاک، درجنوں زخمی

منگل کی شام ملک کی کئی ریاستوں میں موسم نے اچانک کروٹ لے لی۔ گجرات، مہاراشٹر، مدھیہ پردیش، راجستھان، جھارکھنڈ، ہماچل، ہریانہ اور دہلی میں بارش، آندھی اور بجلی گرنے سے 40 لوگ ہلاک ہو گئے۔

تصویر سوشل میڈیا
تصویر سوشل میڈیا
user

قومی آوازبیورو

بارش اور طوفان سے پورے شمالی ہند میں درجہ حرارت میں کمی ہو گئی ہے۔ تیز بارش کے دوران آسمانی بجلی گرنے سے کئی جگہوں سے لوگوں کے مرنے کی خبریں موصول ہو رہی ہیں۔ اطلاعات کے مطابق ملک کے مختلف حصوں میں تیز بارش، ژالہ باری اور آسمانی بجلی کے قہر نے 40 لوگوں کی جان لے لی ہے۔ علاوہ ازیں کم و بیش 35 لوگ اس قدرتی آفات میں زخمی بھی ہو گئے ہیں۔ محکمہ موسمیات نے بدھ اور جمعرات کو بھی موسم اسی طرح خراب رہنے کا امکان ظاہر کیا ہے۔

آسمانی بجلی گرنے سے سب سے زیادہ موت مدھیہ پردیش میں ہوئی ہے۔ الگ الگ مقامات پر بجلی گرنے سے ابھی تک 15 لوگوں کی موت ہو چکی ہے جب کہ کئی افراد زخمی ہیں۔ وزیر اعلیٰ کمل ناتھ نے ٹوئٹ کر کے متاثرہ خاندانوں کے لیے افسوس کا اظہار کیا ہے۔ انھوں نے کہا ہے کہ ’’آسمانی بجلی گرنے سے اندور، دھار ضلع میں اور ریاست کے دیگر مقامات پر اموات کی بہت افسوسناک واقعات سامنے آئے ہیں۔ متاثرہ خاندانوں کے تئیں میری ہمدردی۔ میں اور میری حکومت غم کے اس وقت میں متاثرہ فیملی کے ساتھ کھڑے ہیں۔‘‘

دوسری طرف گجرات میں 11، راجستھان میں 7، پنجاب میں 2، ہریانہ، جھارکھنڈ، مہاراشٹر، اتر پردیش اور ہماچل پردیش میں 1-1 اموات کی خبریں ہیں۔ محکمہ موسمیات کا کہنا ہے کہ پاکستان سے آئے مغربی تلاطم اور گزشتہ 4-3 دنوں سے چل رہی ہیٹ ویو کے سبب ملک کے مغرب-شمال حصے، وسطی علاقہ، وِدربھ اور بنگال تک تیز آندھی، گرج اور بجلی کے ساتھ بارش و ژالہ باری ہوئی۔ یہ حالات بدھ کی شام تک رہے گی۔ ماہر موسمیات کے مطابق بدھ کی دوپہر کے بعد راجدھانی لکھنؤ اور اس کے آس پاس کے علاقوں میں بارش اور آندھی طوفان کے آثار ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔