مغربی بنگال میں بم دھماکہ سے 13 سالہ معصوم کی موت، وزیر اعلیٰ ممتا بنرجی کا اظہارِ افسوس

مغربی بنگال کے کالی گنج اسمبلی حلقہ میں ہوئے ضمنی انتخاب کا نتیجہ آج برآمد ہو گیا۔ ترنمول کانگریس نے ایک بار پھر اس سیٹ پر جیت کا پرچم لہرایا ہے۔ اس درمیان کالی گنج میں ایک دیسی بم پھٹنے کا واقعہ پیش آیا ہے، جس میں 13 سالہ بچی کی موت نے وزیر اعلیٰ ممتا بنرجی کو غمزدہ کر دیا ہے۔ وزیر اعلیٰ نے بچی کے انتقال پر افسوس ظاہر کرتے ہوئے مہلوکہ کے اہل خانہ کے تئیں اپنی ہمدردی کا اظہار کیا ہے۔

میڈیا رپورٹس کے مطابق کالی گنج میں ایک دیسی بم پھٹنے سے بچی زخمی ہو گئی تھی، جس کا بعد میں انتقال ہو گیا۔ پولیس نے اس واقعہ کی جانچ شروع کر دی ہے اور پتہ لگانے کی کوشش کی جا رہی ہے کہ آخر یہ بم کس نے رکھا تھا۔ بنگال پولیس نے سوشل میڈیا پلیٹ فارم پر اس تعلق سے کی گئی ایک پوسٹ میں لکھا ہے کہ ’’کرشنا نگر پولیس ضلع کے کالی گنج تھانہ حلقہ میں بم دھماکہ میں زخمی 13 سالہ لڑکی کی موت ہو گئی۔ ہم واقعہ کے پیچھے کے قصورواروں کو پکڑنے میں کوئی کسر نہیں چھوڑیں گے۔ اس بے حد افسوسناک موت کے لیے ذمہ دار لوگوں کو گرفتار کرنے کے لیے چھاپہ ماری زوروں پر ہے۔‘‘

اس واقعہ کے تعلق سے وزیر اعلیٰ ممتا بنرجی نے بھی سوشل میڈیا پر پوسٹ کرتے ہوئے لکھا ہے کہ ’’میں کرشنا نگر پولیس ضلع کے باروچند نگر میں ہوئے دھماکہ میں ایک بچی کی موت سے حیران اور افسردہ ہوں۔ افسوس کے اس وقت میں میری دعائیں اور ہمدردیاں رشتہ داروں کے ساتھ ہیں۔‘‘ وزیر اعلیٰ نے یہ بھی جانکاری دی کہ پولیس جلد از جلد قصورواروں کے خلاف سخت اور نتیجہ خیز قانونی کارروائی کرے گی۔

اس درمیان الیکشن کمیشن نے بھی اس حادثہ کے بارے میں ضلع مجسٹریٹ سے رپورٹ طلب کی ہے۔ کچھ لوگ ترنمول کانگریس لیڈران و کارکنان پر الزامات عائد کر رہے ہیں۔ الزام لگایا جا رہا ہے کہ جیت کا جشن منانے کے لیے بم کا استعمال کیا جا رہا تھا، حالانکہ جشن میں بم کا استعمال کرنے کی ضرورت نہیں تھی۔