آئی پی ایل 2020: چہل، راشد، اشون؛ سر چڑھ کر بول رہا لیگ اسپنرز کا جادو

دبئی: اس بار آئی پی ایل 13 کے مقابلے متحدہ عرب امارات کے تین گراؤنڈ دبئی ، شارجہ اور ابوظبی میں منعقد ہورہے ہیں۔ ٹورنامنٹ میں لیگ اسپنر ہی چھائے ہوئےہیں جبکہ آف اسپنر ، بائیں ہاتھ کے اسپنر اور چائنامین بولر کو پیچھے چھوڑ دیا ہے۔

ٹورنامنٹ کے اب تک کے اعدادوشمار کے مطابق رائل چیلنجرس بنگلور کے ہندوستانی لیگ اسپنر یجویندر چہل تین میچوں میں پانچ وکٹ کے ساتھ اسپن ڈیپارٹمنٹ کی قیادت کررہے ہیں۔ کنگز الیون پنجاب کے لیگ اسپنر مورگن اشون نے دو میچوں میں چار اور راجستھان رائلز کے لیگ اسپنر راہل تیوتیا نے تین میچوں میں چار وکٹیں حاصل کیں۔

سنرائزرس حیدرآباد کے افغان لیگ اسپنر راشد خان نے تین میچوں میں چار وکٹیں حاصل کیں۔ دہلی کیپٹلز کے خلاف ٹورنامنٹ میں اپنی ٹیم کی پہلی جیت میں راشد نے چار اوور مہلک بالنگ میں 14 رنز دے کر تین وکٹیں حاصل کیں۔ پنجاب کے لیگ اسپنر روی بشنوئی اور ممبئی انڈینز کے لیگ اسپنر راہل چاہر نے تین میچوں میں چار وکٹیں حاصل کیں۔

چنئی سپر کنگز کے لیگ اسپنر پیوش چاولہ نے تین میچوں میں چار اور کولکتہ نائٹ رائیڈرز کے لیگ اسپنر ورون چکرورتی نے دو میچوں میں تین وکٹیں حاصل کیں۔ دہلی کے لیگ اسپنر امیت مشرا نے دو میچوں میں دو وکٹیں حاصل کیں اور وہ ٹورنامنٹ کی تاریخ میں سب سے زیادہ وکٹ لینے والے دوسرے گیند باز ہیں ۔

دہلی کی طرف سے کھیلنے والے ہندوستانی آف اسپنر روی چندرن اشون نے ایک میچ میں دو وکٹیں حاصل کیں لیکن اس کے بعد کندھے کی انجری کی وجہ سے اگلے دو میچوں سے باہر ہوگئے۔ دہلی ٹیم کے بائیں ہاتھ کے اسپنر اکشر پٹیل نے تین میچوں میں دو وکٹیں حاصل کیں۔

چنئی کے بائیں ہاتھ کے اسپنر رویندر جڈیجا نے تین میچوں میں دو اور کولکتہ کے آف اسپنر سنیل نارائن نے تین میچوں میں دو وکٹیں حاصل کیں۔ بنگلور کے آف اسپنر واشنگٹن سندر نے تین میچوں میں ایک وکٹ حاصل کی ہے۔

بنگلور کے بائیں ہاتھ کے اسپنر ابھیشیک شرما نے تین میچوں میں ایک وکٹ حاصل کی ہے ، ممبئی کے بائیں ہاتھ کے اسپنر کرونال پانڈیا نے تین میچوں میں ایک وکٹ حاصل کی ہے اور کولکتہ کے چائنا مین بالر کلدیپ یادو نے تین میچوں میں ایک وکٹ حاصل کی ہے۔

ان اعدادوشمار سے یہ بات واضح ہوجاتی ہے کہ آئی پی ایل کی ٹیمیں اس سیزن میں وکٹ لینے کے لئے لیگ اسپنرز پر زیادہ انحصار کررہی ہیں اور لیگ اسپنرز نے بھی متحدہ عرب امارات کی پچوں پر اپنے آپ کو ثابت کردیا ہے۔ ٹورنامنٹ کا ابھی بہت طویل سفر ہے اور آف اسپنرز ، بائیں ہاتھ کے اسپنرز اور چائنا مین بالرز کو واپسی کا موقع ملے گا تاکہ وہ لیگ اسپنرز کو چیلنج کرسکیں۔