آئی پی ایل 2020: اب تک کوئی میچ نہیں کھیلنے والے عمران طاہر نے کہا "ڈرنکس لے جانے پر بھی خوش ہوں"

دبئی: انڈین پریمیر لیگ (آئی پی ایل) کے پچھلے ایڈیشن میں سب سے زیادہ وکٹیں لینے والے جنوبی افریقہ کے سرکردہ لیگ اسپنر عمران طاہرنے اب تک کھیلے گئے میچوں میں اپنی عدم شرکت پر کہا ہے کہ وہ ٹیم کے لئے ڈرنکس لے جانے پر بھی خوش ہیں اور انہیں اس سے کوئی فرق نہیں پڑتا ہے۔

واضح رہے کہ اس سیزن میں عمران طاہر کو چنئی سپر کنگز کی جانب سے ایک بھی میچ میں موقع نہیں دیا گیا ہے۔ چنئی نے منگل کو سنرائزرس حیدرآباد کے خلاف تین اسپنرز کھلائے لیکن طاہر کو پھر بھی جگہ نہیں مل سکی۔ چنئی کو ٹیم کے انتخاب اور ٹیم میں طاہر کا انتخاب نہ کرنے پر تنقید کا نشانہ بنایا گیا ہے۔ تاہم طاہر مایوس نہیں ہیں۔ طاہر نے ٹویٹ کرتے ہوئے لکھا کہ جب میں کھیلتا ہوں تو بہت سارے کھلاڑی میرے لئے ڈرنکس لاتے ہیں۔ اب جب جو کھلاڑی مستحق ہیں وہ کھیل رہے ہیں تو میرا فرض ہے کہ میں بھی ان کے لئے ڈرنکس لے کر میدان میں جاؤں۔ یہ یرے کھیلنے یا نہ کھیلنے کی بات نہیں ہے یہ ٹیم کی جیت کی بات ہے۔ اگر مجھے موقع ملا تو میں اپنی بھرپور صلاحیتوں کو بروئے کار لاتے ہوئے ٹیم کو جیت دلانے کی پوری کوشش کروں گا، لیکن میرے لئے ٹیم بہت اہم ہے۔