آئی پی ایل 2023: دہلی پر بڑے فرق سے جیت کے بعد کپتان کے ایل راہل کا بیان، اپنے کھلاڑیوں کی تعریف

لکھنؤ: آئی پی ایل 2023 میں گزشتہ شام لکھنؤ سپر جائنٹس (ایل ایس جی) اور دہلی کیپٹلز (ڈی سی) کے درمیان کھیلے گیے مقابلہ میں کے لکھنؤ نے جیت حاصل کی۔ 194 رنوں کا ہدف حاصل کرنے اتری دہلی مقررہ 20 اوور میں 9 وکٹ کے نقصان پر محض 143 رن ہی بنا سکی اور لکھنؤ نے اپنے پہلے میچ میں 50 رنوں سے جیت حاصل کر لی ہے۔

اس شاندار جیت کے بعد ایل ایس جی کے کپتان کے ایل راہل نے کائل میئرز اور مارک ووڈ کی تعریف کی۔ انہوں نے کہا ’’ہم نے 25 سے 30 رنز زیادہ بنائے۔ ہمیں پچ کے بارے میں زیادہ نہیں معلوم نہیں تھا۔ مجھے لگتا ہے کہ اس پچ پر جتنا اسکور ہونا چاہئے تھا ہم نے اس سے 25-30 رنز زیادہ بنا لیے۔ کائل میئرز نے جس انداز میں بیٹنگ کی اور پھر جس انداز کے ساتھ باقی بلے بازوں نے اسپنرز پر حملہ کیا، اس کی وجہ سے اس اچھے اسکور تک پہنچا جا سکا۔‘‘

کے ایل راہل نے انے گیندبازوں کی بھی تعریف کرتے ہوئے کہا ’’میدان پر اوس تھی اور میں نے سوچا کہ پچ بلے بازوں کے لیے بہتر ہو جائے گی لیکن ہمارے گیند بازوں نے شاندار کارکردگی کا مظاہرہ کیا۔ یہ مارک ووڈ کا دن تھا۔ انہوں نے جس طرح کی گیندبازی کی ہر فاسٹ باؤلر کا خواب ہوتا ہے کہ اسی طرح گیندبازی کرے۔ جب کوئی کھلاڑی ایسی لے میں ہوتا ہے اور ایسی کارکردگی دیتا ہے تو ٹیم کے لیے اچھے نتائج آتے ہیں۔‘‘

کے ایل راہل نے مزید کہا کہ یہ ایک اہم فتح تھی۔ ہم یہاں سے اعتماد کے ساتھ آگے بڑھیں گے۔ ٹی ٹوئنٹی کرکٹ ایسی ہے کہ ہر دن آپ کو نئے سرے سے شروع کرنا پڑتا ہے۔

قبل ازیں، لکھنؤ نے پہلے بلے بازی کرتے ہوئے کیریبین بلے باز کائل میئرز کی طوفانی 73 رن کی اننگ کی بدودلت 193 رنوں کا وسیع اسکور بنا دیا۔ لکھنؤ کے نکولس پورن نے 21 گیندوں میں 36 اور آیوش بدونی نے 7 گیندوں میں 18 رنوں کا تعان کیا۔

لکھنؤ کے تیز گیندباز مارک ووڈ نے دہلی کو شروعاتی 3 جھٹکے دے کر بیک فٹ پر دھکیل دیا۔ ووڈ نے آخر میں مزید 2 وکٹ لیے اور دہلی کی کمر ہی توڑ دی۔ مارک ووڈ نے 4 اوور میں محض 14 رن دے کر 5 وکٹ حاصل کیے۔ اس کے علاوہ 2 وکٹ اویس خان (4 اوور میں 29 رن) اور 2 وکٹ روی بشنوئی (4 اوور میں 31 رن) نے حاصل کیے۔

دہلی کی طرف سے صرف کپتان وارنر نے 56 رنوں کی قابل ذکر اننگ کھیلی لیکن اس کے لیے انھوں نے 48 گیندوں کا سامنا کیا۔ ریلی روسو دوسرے قابل ذکر بلے باز رہے جنھوں نے 20 گیندوں پر 30 رنوں کی اننگ کھیلی۔ دہلی کے نائب کپتان اکشر پٹیل نے 16 رن اور پرتھوی شا نے 12 رنوں کا تعاون کیا۔ باقی کوئی بھی بلے باز دہائی کا ہندسہ بھی نہیں چھو سکا۔