انٹرویو: کولکاتا میں طالبات کے درمیان اُردو کا چراغ روشن کر رہے ڈاکٹر امتیاز احمد علیمی

’کلکتہ گرلس کالج‘ مغربی بنگال کے قدیم اور خواتین کے ممتاز تعلیمی اداروں میں شمار ہوتا ہے۔ اس کا قیام خواتین کو اعلیٰ تعلیم کے مواقع فراہم کرنے کے مقصد سے عمل میں آیا۔ یہ کالج 1963 سے علمی، ادبی اور سماجی میدانوں میں نمایاں خدمات انجام دے رہا ہے۔ یہاں مختلف زبانوں، مثلاً اردو، ہندی، انگریزی اور بنگلہ کے علاوہ علومِ انسانی، سماجی علوم و شعبہ اقتصادیات فعال ہیں اور طالبات کی ہمہ جہت شخصیت سازی پر خصوصی توجہ دی جاتی ہے۔ میں اپنے اب تک کے مشاہدہ اور گزشتہ 2 برسوں کے تدریسی تجربہ کی بنیاد پر کہہ سکتا ہوں کہ پورے کالج میں سب سے زیادہ فعال اور متحرک شعبہ ہمارا ’شعبہ اردو‘ ہی ہے. شعبہ اردو کی طالبات روزانہ کلاسز بھی کرتی ہیں اور دیگر سرگرمیوں میں بھی پورے جوش کے ساتھ شریک ہوتی ہیں۔ انھیں نصابی سرگرمیوں کے علاوہ بھی کوئی کام دیا جاتا ہے تو وقت معینہ پر بحسن خوبی انجام دیتی ہیں۔

جہاں تک اس ادارے سے متعدد ماہرین تعلیم، ادیب، دانشور اور سماجی شخصیات کی وابستگی کا سوال ہے، تو فی الحال جسے میں جانتا ہوں وہ ڈاکٹر نعیم انیس صاحب (سابق صدر شعبہ اردو اور موجودہ اعزازی جنرل سیکرٹری ’دی مسلم انسٹی ٹیوٹ‘) ہیں جنھوں شعبہ اردو اور کالج دونوں کو علمی اور ادبی دنیا میں متعارف کرانے میں نمایاں کارنامہ انجام دیا۔ ان کے علاوہ موجودہ صدر شعبہ اردو ڈاکٹر محمد امتیاز احمد اور دیگر اساتذہ میں ڈاکٹر سید ومیق الارشاد علی القادری، محترمہ شیرین ظفر اور محترمہ ممتاز آرا بھی ہیں جنھوں نے طالبات کی رہنمائی میں اہم کردار ادا کیا ہے۔ حقیقت تو یہ ہے کہ جو بھی اس شعبہ سے وابستہ رہا اس نے  کالج کی علمی و ثقافتی سرگرمیوں میں بڑھ چڑھ کر حصہ لیا اور شعبہ کو ایک نئی اونچائی عطا کی۔ انہی کاوشوں کا نتیجہ ہے کہ آج ہمارا کالج کولکاتا کے اہم تعلیمی مراکز میں شمار کیا جاتا ہے۔

بلاشبہ ’کلکتہ گرلس کالج‘کے تعلیمی ماحول، انتظامی ترجیحات اور طالبات کے باہمی تعلقات کی نوعیت مشترکہ تعلیم والے کالجوں سے کسی حد تک مختلف ہے۔ یہاں خدمات انجام دیتے ہوئے میں نے محسوس کیا کہ اس ادارے کی تمام سرگرمیوں کا محور طالبات کی تعلیمی، فکری اور شخصی نشو و نما ہے۔ سب سے اہم فرق یہ ہے کہ کالج کا پورا نظام طالبات کی ضروریات اور مسائل کو سامنے رکھ کر ترتیب دیا گیا ہے۔ انتظامیہ طالبات کے تحفظ، ذہنی آسودگی اور تعلیمی ترقی کو خصوصی اہمیت دیتی ہے۔ یہی وجہ ہے کہ یہاں ایک محفوظ، پُرسکون اور دوستانہ تعلیمی ماحول قائم ہے جس میں طالبات بلا جھجک اپنی رائے کا اظہار کرتی ہیں اور مختلف علمی و ثقافتی سرگرمیوں میں فعال کردار ادا کرتی ہیں۔

مشترکہ تعلیم والے کالجوں میں طلبا و طالبات کے درمیان مقابلہ اور باہمی تعامل کی ایک الگ فضا ہوتی ہے، جبکہ کلکتہ گرلس کالج میں طالبات کو قائدانہ صلاحیتیں اجاگر کرنے کے زیادہ مواقع حاصل ہوتے ہیں۔ طلبا کی عدم موجودگی میں طلبا یونین، سیمینارز، مباحثوں، ثقافتی پروگراموں اور دیگر ہم نصابی سرگرمیوں کی قیادت عموماً طالبات ہی کے ہاتھ میں ہوتی ہے، جس سے ان میں خود اعتمادی، فیصلہ سازی اور قیادت کی صلاحیت فروغ پاتی ہے۔

ایک اور نمایاں پہلو اساتذہ اور طالبات کے درمیان قریبی علمی و تربیتی تعلق کا ہے۔ طالبات اکثر اپنے تعلیمی، سماجی و پیشہ ورانہ مسائل کے حوالے سے اساتذہ سے کھل کر گفتگو کرتی ہیں۔ اس ماحول میں اساتذہ صرف تدریس تک محدود نہیں رہتے بلکہ رہنمائی اور مشاورت کا کردار بھی ادا کرتے ہیں۔ انتظامی سطح پر بھی بعض فرق نمایاں ہیں۔ مثال کے طور پر خواتین کی صحت، حفظانِ صحت، سلامتی اور ذہنی بہبود سے متعلق خصوصی انتظامات اور پروگرام منعقد کیے جاتے ہیں۔ خواتین کے حقوق، صنفی مساوات، خود انحصاری، کیریئر سازی اور سماجی شعور سے متعلق ورکشاپس اور لیکچرز کا انعقاد بھی نسبتاً زیادہ ہوتا ہے۔ البتہ بعض مواقع پر مشترکہ تعلیم والے اداروں کے مقابلے میں طلبا و طالبات کے درمیان براہِ راست علمی و فکری تبادلے کے مواقع کم ہوتے ہیں۔ موجودہ دور میں جب عملی زندگی میں مرد و خواتین کو ایک ساتھ کام کرنا پڑتا ہے، تو بعض لوگوں کے نزدیک مشترکہ تعلیمی ماحول اس حوالے سے زیادہ متنوع تجربات فراہم کرتا ہے۔ تاہم کلکتہ گرلس کالج مختلف بین الجامعاتی پروگراموں، سیمیناروں، کانفرنسوں اور سماجی سرگرمیوں کے ذریعے اس خلا کو کافی حد تک پُر کرنے کی کوشش کرتا ہے۔

میرے تجربے کے مطابق اردو زبان کا مستقبل روشن ہے، بشرطیکہ ہم اسے جدید تقاضوں سے ہم آہنگ کرنے کی سنجیدہ کوشش کریں۔ مدارس، اسکولوں، کالجوں اور جامعات میں اردو کی تدریس جاری ہے اور نئی نسل میں بھی اردو ادب، صحافت، ترجمہ اور تخلیقی تحریر کے حوالے سے دلچسپی موجود ہے۔ ڈیجیٹل میڈیا نے اردو کے فروغ کے لیے نئی راہیں کھولی ہیں۔ آج اردو صرف ایک زبان نہیں بلکہ ایک تہذیبی ورثہ اور علمی سرمایہ ہے جس کی اہمیت مستقبل میں بھی برقرار رہے گی۔ ضرورت اس امر کی ہے کہ اردو کو روزگار، تحقیق اور ٹیکنالوجی سے جوڑا جائے اور طالبات کی درست رہنمائی کرتے ہوئے انھیں ہر طرح کے مقابلہ جاتی امتحانات کی تیاری کرائی جائے۔ انھیں مقاصد کے حصول کے لیے بار بار یاد دہانی کراتے رہنا چاہیے تاکہ وہ اپنے ہدف تک پہنچ سکیں۔

’کلکتہ گرلس کالج‘ کا اردو شعبۂ اردو زبان و ادب کے فروغ کے لیے مختلف علمی و ادبی سرگرمیوں کا انعقاد کرتا ہے۔ سیمینار، ورکشاپ، مشاعرہ، مذاکرہ، مضمون نویسی اور تقریری مقابلے وقتاً فوقتاً منعقد کیے جاتے ہیں۔ قومی اور بین الاقوامی موضوعات پر علمی نشستیں بھی منعقد کی جاتی ہیں تاکہ طالبات میں تنقیدی اور تحقیقی شعور پیدا ہو۔ خوش آئند بات یہ ہے کہ طالبات ان سرگرمیوں میں نہایت جوش و خروش کے ساتھ حصہ لیتی ہیں۔ ان کی تخلیقی صلاحیتوں کو ابھارنے اور اردو زبان سے ان کی وابستگی کو مضبوط بنانے میں یہ تقاریب اہم کردار ادا کرتی ہیں۔

کورونا کے بعد تعلیم کے میدان میں ڈیجیٹل ٹیکنالوجی کا استعمال غیر معمولی طور پر بڑھا ہے۔ آن لائن کلاسز، ڈیجیٹل لائبریریز، ای لرننگ پلیٹ فارمز اور ورچوئل سیمینارز نے تدریسی عمل کو نئی جہت عطا کی ہے۔ میری نظر میں یہ تبدیلی ایک مثبت پیش رفت ہے کیونکہ اس سے تعلیم تک رسائی آسان ہوئی ہے اور تدریسی وسائل میں وسعت پیدا ہوئی ہے۔ تاہم روایتی کلاس روم کی اہمیت اپنی جگہ برقرار ہے، کیونکہ تعلیم صرف معلومات کی منتقلی کا نام نہیں بلکہ استاد اور طالب علم کے درمیان فکری و انسانی تعلق کا بھی تقاضا کرتی ہے۔ اس لیے مستقبل کی تعلیم میں روایتی اور ڈیجیٹل دونوں طریقوں کے امتزاج کو زیادہ مؤثر اور مفید سمجھتا ہوں۔