شریف عثمان ہادی کی موت کے بعد بنگلہ دیش میں شدید ہنگامہ آرائی، ڈھاکہ سمیت کئی شہروں میں تشدد
شریف عثمان ہادی کی موت کی خبر پر ڈھاکہ سمیت بنگلہ دیش کے کئی شہروں میں پرتشدد مظاہرے پھوٹ پڑے۔ اس دوران، اخباری دفاتر، سیاسی جماعتوں کے دفاتر اور عوامی مقامات کو نشانہ بنایا گیا
بنگلہ دیش میں حالات اس وقت بگڑ گئے جب ’انقلاب منچ‘ کے ترجمان اور سرکردہ تحریک کار شریف عثمان ہادی کی موت کی خبر سامنے آئی۔ سنگاپور میں علاج کے دوران جمعرات کو ہادی کے انتقال کے فوراً بعد راجدھانی ڈھاکہ سمیت کئی بڑے شہروں میں احتجاج شروع ہوا، جو دیکھتے ہی دیکھتے تشدد میں بدل گیا۔
ڈھاکہ کے کارواں بازار علاقے میں مشتعل مظاہرین نے ملک کے بڑے بنگلہ روزنامے پرتھم آلو اور انگریزی اخبار دی ڈیلی اسٹار کے دفاتر پر حملہ کر دیا۔ عمارتوں میں توڑ پھوڑ کی گئی، فرنیچر اور دستاویزات باہر نکال کر نذرِ آتش کر دی گئیں۔ مقامی میڈیا کے مطابق حملے کے وقت متعدد صحافی اور ملازمین دفاتر کے اندر پھنس گئے تھے، جنہیں بعد میں سکیورٹی اہلکاروں نے بحفاظت نکالا۔ دی ڈیلی اسٹار نے اپنے عملے کی سلامتی سے متعلق شدید تشویش کا اظہار کیا۔
تشدد کا دائرہ صرف راجدھانی تک محدود نہ رہا۔ راج شاہی میں مظاہرین نے عوامی لیگ کے ایک دفتر کو آگ لگا دی۔ اسی طرح چٹ گاؤں میں بڑی تعداد میں لوگ ہندوستانی ہائی کمیشن کے دفتر کے باہر جمع ہو گئے، جہاں پتھراؤ کیا گیا اور ہند مخالف و عوامی لیگ مخالف نعرے لگائے گئے۔ ان واقعات کے بعد سکیورٹی اداروں کو ہائی الرٹ پر رکھا گیا۔
ادھر، ہادی کی موت کی خبر پھیلتے ہی ڈھاکہ کے شاہ باغ چوراہے پر ہزاروں افراد جمع ہو گئے۔ مظاہرین نے سڑکیں بند کر دیں اور حکومت پر ہادی کی حفاظت میں ناکامی کا الزام لگایا۔ ابتدا میں پُرامن نظر آنے والا احتجاج جلد ہی پرتشدد رخ اختیار کر گیا، جس کے نتیجے میں مختلف علاقوں میں آگ زنی اور توڑ پھوڑ کے واقعات پیش آئے۔
واضح رہے کہ 12 دسمبر کو ڈھاکا کے بجوئے نگر علاقے میں انتخابی مہم کے دوران نامعلوم حملہ آوروں نے شریف عثمان ہادی کو سر میں گولی مار دی تھی۔ شدید زخمی حالت میں انہیں پہلے ڈھاکہ کے ایک اسپتال میں داخل کیا گیا، بعد ازاں 15 دسمبر کو ایئر ایمبولینس کے ذریعے سنگاپور منتقل کیا گیا، جہاں علاج کے دوران ان کی موت ہو گئی۔ بنگلہ دیش کی وزارتِ خارجہ اور سنگاپور حکام نے ان کی موت کی تصدیق کی ہے۔
شریف عثمان ہادی جولائی 2024 کی بغاوت کے دوران قومی سطح پر ابھر کر سامنے آئے تھے، جب شیخ حسینہ حکومت کا تختہ الٹا گیا۔ وہ عوامی لیگ پر آئینی پابندی کے مطالبے کی مہم کا نمایاں چہرہ سمجھے جاتے تھے اور ہند نواز سیاست کے سخت ناقد مانے جاتے تھے۔
صورتحال کی سنگینی کو دیکھتے ہوئے عبوری حکومت کے سربراہ محمد یونس نے ہنگامی اجلاس طلب کیا اور قوم سے خطاب میں امن برقرار رکھنے کی اپیل کی۔ انہوں نے جمعہ کے روز قومی سوگ کا اعلان کرتے ہوئے ہادی کے قاتلوں کو کیفرِ کردار تک پہنچانے کا وعدہ کیا۔ تشدد کے بعد ڈھاکہ، چٹ گاؤں اور راج شاہی میں سکیورٹی مزید سخت کر دی گئی ہے، تاہم ملک میں کشیدگی تاحال برقرار ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔