امریکہ: واشنگٹن ڈی سی میں فائرنگ کے دوران ایک نابالغ ہلاک، پولیس افسر سمیت کئی افراد زخمی

واشنگٹن: امریکہ میں ایک مرتبہ پھر اندھادھند فائرنگ کا واقعہ پیش آیا ہے۔ واشنگٹن ڈی سی میں پولیس افسر سمیت کئی لوگوں کو میوزک کنسرٹ کے دوران گولی ماری گئی ہے۔ میڈیا رپورٹ کے مطابق شوٹنگ کے اس واقعہ میں ایک نابالغ کی موت ہو گئی ہے جبکہ پولیس افسر سمیت کئی افراد زخمی ہوئے ہیں۔

پولیس نے بتایا کہ ایک نابالغ کی موت کا خدشہ ہے، جبکہ تین دیگر زخمی ہیں۔ فائرنگ کے واقعے میں زخمی ہونے والوں میں ایک پولیس اہلکار بھی شامل ہے۔ ملزم کی تلاش جاری ہے۔ ایک بیان میں واشنگٹن ڈی سی پولیس نے کہا ایسا لگتا ہے کہ ایک نابالغ فوت ہو چکا ہے۔ 2 دیگر شہری اور ایک پولیس اہلکار زخمی ہیں اور ان کا علاج کیا جا رہا ہے۔

اپنے آفیشل ہینڈل پر پولیس نے ایک ٹویٹ میں کہا کہ ایک پولیس افسر سمیت متعدد لوگوں کو گولی مار دی گئی ہے اور موقع پر کارروائی کی جا رہی ہے۔ رپورٹ کے مطابق فائرنگ کا یہ واقعہ موئےچیلا ککےک دوران ہوا، جسے واشنگٹن ڈی سی کی ثقافت کو فروغ دینے والے جشن کے طور پر منایا جاتا ہے۔

یہ واقعہ ٹیکساس میں فائرنگ کے ایک واقعے کے بعد سامنے آیا ہے جس نے پورے ملک میں سنسنی پھیلا دی تھی اور بندوق کے قوانین پر بحث کو ہوا دی تھی۔ یہ واقعہ 24 مئی کو پیش آیا تھا، جس میں 19 بچوں کو ٹیکساس کے ایک ایلیمنٹری اسکول میں ایک نوعمر بندوق بردار نے گولی مار کر ہلاک کر دیا تھا۔