یو این میں نتن یاہو کے خطاب کا عالمی بائیکاٹ؛ متعدد عرب، مسلم، افریقی اور یورپی ممالک کا واک آؤٹ

اقوام متحدہ کی جنرل اسمبلی میں اسرائیلی وزیراعظم بنجامن نتن یاہو کا خطاب جمعہ کے روز ایک غیر معمولی منظر کا باعث بنا۔ جیسے ہی نتن یاہو اسٹیج پر آئے، متعدد عرب، مسلم، افریقی اور بعض یورپی ممالک کے نمائندے اجتماعی طور پر واک آؤٹ کرتے ہوئے باہر نکل گئے، جس کے نتیجے میں ہال تقریباً خالی ہو گیا۔

امریکی وفد اپنی نشستوں پر موجود رہا اور کچھ نمائندوں نے تالیاں بجا کر نتن یاہو کا خیر مقدم بھی کیا۔ خطاب کے دوران ہال میں شور اور مکس ردعمل دیکھا گیا لیکن نتن یاہو نے اپنی تقریر جاری رکھی اور زور دیا کہ اسرائیل کو غزہ میں حماس کے خلاف کارروائی مکمل کرنی ہوگی۔

نتن یاہو نے اپنی تقریر میں ایک نقشہ اور کیو آر کوڈ کا استعمال بھی کیا۔ انہوں نے اسکرین پر نقشہ دکھاتے ہوئے بڑے نشانات لگائے اور اپنے سوٹ کی جیکٹ پر کاغذی کیو آر کوڈ چسپاں کیا، جسے سامعین کے سامنے دکھایا۔ اس کے علاوہ، انہوں نے ایک بورڈ اٹھایا جس پر ملٹی پل چوائس سوالات درج تھے اور انہیں سامعین کے سامنے پڑھ کر سنایا۔

خطاب سے قبل، نتن یاہو نے اسرائیلی فوج کو ہدایت دی کہ غزہ کی پٹی کے اطراف میں لاؤڈ اسپیکر لگائے جائیں تاکہ ان کا خطاب فلسطینی عوام تک براہِ راست پہنچ سکے۔ اسرائیلی خفیہ اداروں نے بھی فونز کے ذریعے تقریر کو براہِ راست نشر کیا۔

اپنی تقریر میں نتن یاہو نے امریکی صدر ڈونلڈ ٹرمپ کی بار بار تعریف کی اور کہا کہ اسرائیل اور امریکہ کے تعلقات ناقابلِ تنسیخ ہیں۔ انہوں نے حماس رہنماؤں سے مطالبہ کیا کہ وہ ہتھیار ڈالیں، یرغمالیوں کو رہا کریں اور فوری طور پر سرنڈر کریں۔

یہ تقریر عالمی دباؤ اور بڑھتی ہوئی تنہائی کے دوران نتن یاہو کے لیے ایک اہم موقع تھی۔ حال ہی میں آسٹریلیا، کینیڈا، فرانس اور برطانیہ سمیت کئی ممالک نے فلسطین کو آزاد ریاست کے طور پر تسلیم کیا ہے، جس سے اسرائیل پر سفارتی دباؤ مزید بڑھ گیا ہے۔

بین الاقوامی برادری کی جانب سے جنگ بندی کے مطالبات کے باوجود نتن یاہو نے دو ریاستی حل کو مسترد کیا اور کہا کہ اسے قبول کرنا حماس کو انعام دینے کے مترادف ہوگا۔ انہوں نے واضح کیا کہ اسرائیل اپنی سلامتی کے لیے ہر ممکن اقدام کرے گا اور غزہ میں جاری آپریشن مکمل کیا جائے گا۔

نتن یاہو پر عالمی سطح پر جنگی جرائم کے الزامات بھی عائد ہیں اور کئی ممالک میں مظاہرے ہو رہے ہیں۔ ہال کا خالی ہونا اس بات کا مظہر ہے کہ دنیا کے بیشتر ممالک ان کے مؤقف کو مسترد کر رہے ہیں اور اسرائیل بڑھتی ہوئی عالمی تنہائی کا سامنا کر رہا ہے۔