یوکرین کا روس پر بڑا ڈرون حملہ، گودام کو نشانہ بنانے سے 7 افراد ہلاک، درجنوں زخمی

ماسکو: یوکرین نے روس کے مختلف علاقوں پر بڑے پیمانے پر ڈرون حملے کیے ہیں، جن میں روس کی سب سے بڑی آن لائن خوردہ کمپنی کے لاجسٹکس مراکز کو نشانہ بنایا گیا۔ روسی حکام کے مطابق اس حملے میں کم از کم 7 افراد ہلاک اور 49 زخمی ہوئے ہیں، جبکہ متعدد عمارتوں اور تنصیبات کو بھی نقصان پہنچا ہے۔

روسی حکام کے مطابق تامبوف علاقے کے کوتوفسک شہر میں واقع ایک بڑے گودام پر ہونے والے حملے میں 7 ملازمین موقع پر ہی ہلاک ہو گئے۔ یہ تمام ملازمین رات کی شفٹ میں اپنی خدمات انجام دے رہے تھے۔ اسی حملے میں 25 افراد زخمی ہوئے، جنہیں فوری طور پر طبی امداد فراہم کی گئی۔

دوسری جانب ماسکو کے قریب الیکٹروسٹال میں واقع اسی کمپنی کے ایک اور گودام کو بھی نشانہ بنایا گیا، جہاں 24 افراد زخمی ہوئے۔ اس طرح دونوں حملوں میں زخمی ہونے والوں کی مجموعی تعداد 49 تک پہنچ گئی ہے۔

تامبوف کے گورنر یوگینی پیرویشوف نے بتایا کہ روسی فضائی دفاعی نظام نے حملے کے دوران 28 یوکرینی ڈرون فضا ہی میں مار گرائے۔ ان کا کہنا تھا کہ اگر تمام ڈرون اپنے اہداف تک پہنچ جاتے تو جانی نقصان کہیں زیادہ ہو سکتا تھا۔ حملے کے بعد گودام میں آگ لگ گئی تھی، جس پر بعد میں قابو پا لیا گیا۔

ادھر ماسکو کے نواحی علاقے نوگنسک میں ایک تیل ذخیرہ گاہ میں بھی آگ لگنے کی اطلاع ملی ہے۔ روسی حکام کے مطابق یہ آگ ایک ڈرون کے ملبے کے گرنے کے نتیجے میں بھڑکی۔ اس واقعے میں دو افراد زخمی ہوئے، جبکہ احتیاطی تدابیر کے طور پر قریبی زچگی اسپتال کو خالی کرا لیا گیا۔

روسی حکام کا کہنا ہے کہ متعلقہ تیل ذخیرہ گاہ میں پٹرول، ڈیزل اور مٹی کے تیل سمیت ہلکے پیٹرولیم مصنوعات ذخیرہ کی جاتی ہیں۔ واقعے کے بعد امدادی اور بچاؤ کی کارروائیاں جاری ہیں اور نقصان کا مکمل تخمینہ لگایا جا رہا ہے۔

یوکرین کے صدر وولودی میر زیلنسکی نے حملوں کی تصدیق کرتے ہوئے کہا ہے کہ ان کارروائیوں میں ان لاجسٹکس مراکز کو نشانہ بنایا گیا جو مبینہ طور پر ڈرون سازی اور نیوی گیشن آلات میں استعمال ہونے والے پابندی عائد شدہ پرزوں کی ترسیل کے لیے استعمال ہو رہے تھے۔ ان کے مطابق بحیرہ آزوف، بحیرہ اسود اور روس کے زیر قبضہ کریمیا میں بھی متعدد اہداف کو نشانہ بنایا گیا ہے۔

انہوں نے کہا کہ یہ کارروائیاں یوکرین کے شہروں اور شہری بنیادی ڈھانچے پر روسی حملوں کے جواب میں کی گئی ہیں۔ روس اور یوکرین کے درمیان فروری 2022 سے جاری جنگ میں حالیہ مہینوں کے دوران ڈرون حملوں میں نمایاں اضافہ دیکھنے میں آیا ہے۔