حلف برداری کے بعد وہائٹ ہاؤس میں ایکشن میں نظر آئیں گے ٹرمپ، 200 احکام پر دستخط کی تیاری

ڈونالڈ ٹرمپ حلف برداری کے ساتھ ہی آج امریکہ کے 47ویں صدر کے طور پر اپنا عہدہ سنبھال لیں گے۔ عہدہ سنبھالتے ہی ٹرمپ زوردار ایکشن میں نظر آنے والے ہیں۔ وہائٹ ہاؤس میں داخل ہونے کے فوراً بعد وہ تقریباً 200 ایگزیکٹیو آرڈرز پر دستخط کریں گے۔ ایگزیکٹیو احکام کا اہم مقصد انتخابی وعدوں کو پورا کرنا ہے۔ ٹرمپ کے قریبی معاونین میں سے ایک اسٹیفن ملر نے بتایا کہ اس میں خاص طور سے 5 موضوع شامل ہوں گے۔ جنوبی سرحد کو سیل کرنا، اجتماعی ملک بدری، خواتین کے کھیل سے ٹرانس جینڈر لوگوں کو روکنا، توانائی کی تلاش پر پابندیاں ہٹانا اور حکومتی کارکردگی کو بہتر بنانا۔

ایگزیکٹیو احکام میں ٹرمپ کے حامیوں کو معافی ملنے کی امید ہے، جنہیں 4 سال پہلے 6 جنوری کو کیپٹل ہل حملے میں ان کے کردار کے لیے گرفتار کیا گیا تھا۔ ٹرمپ کی طرف سے بائیڈن کے کچھ ایگزیکٹیو احکام اور کاموں کو واپس لینے کی بھی امید ہے۔ ان میں سے پیرس آب و ہوا معاہدہ، جیواشم ایندھن پر پابندی ہٹانا اہم ہیں۔ بائیڈن نے اپنے پہلے دن 9 ایگزیکٹیو احکام جاری کیے تھے، ان میں سے 6 میں ٹرمپ کے فیصلوں کو بدلنا شامل تھا۔

این بی سی نیوز کو دیے گئے انٹرویو میں ڈونالڈ ٹرمپ نے کہا کہ وہ پہلے دن ایگزیکٹیو احکام کی ریکارڈ تعداد میں دستخط کرنے کا منصوبہ بنا رہے ہیں۔ واضح ہو کہ ایگزیکٹیو احکام صدر کے ذریعہ یکطرفہ جاری حکم ہے، جو قانون کی طرح طاقت رکھتا ہے۔ قانون کے برعکس ایگزیکٹیو احکام کو کانگریس کی منظوری کی ضرورت نہیں ہوتی۔ کانگریس انہیں پلٹ نہیں سکتی لیکن عدالت میں چیلنج کیا جاسکتا ہے۔

ڈونالڈ ٹرمپ دوسری بار امریکی صدر عہدے کا حلف لینے والے ہیں۔ اس بار ان کے پاس گزشتہ مدت کار سے زیادہ کا تجربہ ہے۔ وہیں ٹیم بھی پچھلی مرتبہ کے مقابلے زیادہ مضبوط بتائی جا رہی ہے۔ کئی ٹیک قد آوروں کو ٹرمپ نے اپنی ٹیم میں شامل کیا ہے۔ ان میں ایلن مسک کا نام سب سے اہم ہے۔