احمد آباد طیارہ حادثہ پر ٹرمپ کا ردعمل، فضائی تاریخ کے سب سے افسوسناک واقعات میں سے ایک قرار دیا

احمد آباد میں پیش آئے افسوسناک فضائی حادثے پر امریکی صدر ڈونلڈ ٹرمپ نے گہرے دکھ کا اظہار کرتے ہوئے اسے فضائی تاریخ کے سب سے افسوسناک حادثات میں سے ایک قرار دیا۔ ان کا کہنا تھا کہ امریکہ ہر طرح کی مدد فراہم کرنے کے لیے تیار ہے اور ہندوستان جیسے مضبوط ملک اس طرح کے چیلنج کا کامبابی کے ساتھ سامنا کرنے کی صلاحیت کے حامل ہیں۔

ٹرمپ نے ایک بیان میں کہا، "یہ حادثہ نہایت ہی خوفناک ہے۔ ہم نے طیارے کو دیکھا، وہ بالکل ٹھیک پرواز کر رہا تھا لیکن شاید انجنوں کی طاقت ختم ہو گئی تھی۔ یہ بہت ہی افسوسناک واقعہ ہے، فضائی تاریخ میں بدترین حادثوں میں شمار ہوگا۔ میں نے ہندوستانی حکام سے کہا ہے کہ اگر کسی بھی طرح کی مدد درکار ہو تو ہم فوری طور پر وہاں موجود ہوں گے۔‘‘

واضح رہے کہ یہ حادثہ ایئر انڈیا کی پرواز اےآئی-171 کو پیش آیا، جو بوئنگ 787-8 ڈریم لائنر طیارہ تھا۔ یہ طیارہ احمد آباد ہوائی اڈے سے لندن کے لیے روانہ ہوا تھا لیکن پرواز کے کچھ ہی لمحے بعد حادثے کا شکار ہو گیا۔ طیارے میں عملے سمیت 242 افراد سوار تھے۔

ایئر انڈیا کے سی ای او اور مینیجنگ ڈائریکٹر کیمبل ولسن نے بھی اس واقعے پر شدید رنج کا اظہار کیا ہے۔ انہوں نے اسے ایئر انڈیا کے لیے ایک مشکل دن قرار دیا اور کہا کہ تمام تر توجہ اب متاثرہ مسافروں، عملے اور ان کے اہل خانہ کی مدد پر مرکوز ہے۔

سوشل میڈیا پلیٹ فارم ایکس پر جاری ایک ویڈیو پیغام میں ولسن نے کہا، ’’ہم فوری طور پر مقامی حکام کے ساتھ مل کر ہنگامی ردعمل پر کام کر رہے ہیں۔ زخمیوں کو قریبی اسپتالوں میں منتقل کر دیا گیا ہے۔ ہماری ایک خصوصی میڈیکل ٹیم بھی احمد آباد روانہ کی جا رہی ہے تاکہ اضافی مدد فراہم کی جا سکے۔‘‘

انہوں نے مزید بتایا کہ ایئر انڈیا نے ایک خصوصی ہیلپ لائن قائم کی ہے تاکہ مسافروں کے رشتہ دار اور دوست ان سے رابطہ کر سکیں۔ ولسن نے کہا، ’’ہم جانتے ہیں کہ بہت سے لوگ اپنے عزیزوں کی خیریت کے بارے میں پریشان ہیں، اس لیے ہم نے ایک مخصوص ہیلپ لائن قائم کی ہے تاکہ وہ ہم سے براہ راست معلومات حاصل کر سکیں۔‘‘

حادثے کی وجوہات کے حوالے سے تحقیقات جاری ہیں، تاہم ابتدائی اطلاعات کے مطابق طیارے کے انجن میں تکنیکی خرابی پیش آئی تھی جس کی وجہ سے وہ کنٹرول کھو بیٹھا اور زمین سے ٹکرا گیا۔