'جو وعدہ کیا وہ نبھایا'، سنیتا ولیمس کی واپسی پر ٹرمپ کا اظہار خوشی، مسک اور 'ناسا' کا کیا شکریہ

ہند نژاد امریکی خلا باز سنیتا ولیمس اور بُچ ولمور کی 9 مہینے بعد خلا سے واپسی ہو گئی ہے۔ دونوں اسپیس ایکس کے ڈریگن کیپسول سے زمین پر اترے۔ ان کی واپسی سے دنیا بھر میں زبردست خوشی کی لہر ہے۔ اب امریکی صدر ڈونالڈ ٹرمپ کا اس سلسلے میں بیان سامنے آیا ہے۔

ڈونالڈ ٹرمپ نے کہا، "جو وعدہ کیا تھا، وہ نبھایا گیا۔ آج وہ محفوظ طور پر 'گلف آف امریکہ' میں لوٹ آئے، اس کے لیے ایلون مسک، اسپیس ایکس اور ناسا کا شکریہ۔"

وہیں ایلون مسک نے بھی 'ناسا' اور اسپیس ایکس کی ٹیموں کو ان کی کامیاب واپسی کے لیے مبارک باد دی اور مشن کو ترجیح دینے کے لیے ٹرمپ کا شکریہ ادا کیا۔

'ناسا' کرو-9 کے خلائی مسافروں نے اسپیس ایکس کے ڈریگن کیپسول کے کامیاب اسپلیش ڈاؤن کے بعد 9 مہینے میں پہلی بار زمین کی ہوا میں سانس لی۔ خلائی مسافر، جیسا کی روایت ہے، اسٹریچر پر کیپسول سے اترے۔ اسپیس ایکس کے ذریعہ یہ احتیاط طویل مدت کے خلائی مشن سے لوٹنے والے سبھی خلائی مسافروں کے لیے برتی جاتی ہے۔

ایلون مسک نے ناسا کے ساتھ مل کر اپنے ڈریگن جہاز کو خلا میں بھیجا تھا۔ آج بدھ کو ہندوستانی وقت کے مطابق 3:27 بجے ڈریگن کیپسول نے فلوریڈا کے سمندری سطح پر کامیاب لینڈنگ کرکے نئی تاریخ رقم کر دی۔ ناسا نے اس مشن کو کامیاب بنانے کے لیے اسپیس ایکس کا شکریہ ادا کیا۔

واضح رہے کہ اسٹار لائنر خلائی جہاز میں کچھ خرابی کی وجہ سے تاخیر ہوئی جو پچھلے سال گرمیوں میں بُچ ولمور اور سنیتا ولیمس کے ذریعہ کیے گئے ایک ٹیسٹ اڑان کے دوران سامنے آئی تھی۔ جس کی وجہ سے خلائی مسافر ایک ہفتے کے بجائے نو مہینے تک خلا میں رہے۔