میڈیسن کا نوبل اِنعام مشترکہ طور پر کیلن، ریٹکلف اور سیمنزا کے نام

اسٹاک ہوم : امریکی سائنس دانوں ولیم جی کیلن جونیئر اور گریگ ایل سیمنزا اور برطانونی سائنس داں پیٹر جے ریٹکلف نے مشترکہ طورپر میڈیسن میں 2019کا نوبل انعام حاصل کیاہے۔

نوبل کمیٹی نے پیر کےروز ایک بیان میں اعلان کیاکہ یہ اعزاز اس دریافت کے لیے دیاگیاہے کہ خلیے آکسیجن کی دستیابی کو کیسے محسوس کرتے ہیں اور اسے اپنے موافق بناتے ہیں ۔اس تحقیق سے خون کی کمی اور سرطان جیسی بیماریوں کے علاج کے نئے طریقے دریافت ہوسکیں گے۔

نوبل انعام کمیٹی نے کہا،’’ نوبل انعام یافتگان نے اس سال جو دریافتیں کی ہیں وہ فزیولوجی کےلیے بنیادی اہمیت کی حامل ہیں اور خون کی کمی ،سرطان اور بہت سی دیگر بیماریوں سے لڑنے کے لیے نئی حکمت عملی اختیار کرنے کی راہ ہموار کی ہے ۔‘‘انعام کی رقم 913000ڈالر ہے۔

گزشتہ سال یہ انعام مشترکہ طورپر ٹیکساس یونیورسٹی کے پروفیسر جیمس پی ایلیسن ا ورجاپان کی کیوٹو یونیورسٹی کے تاسوکو ہونجو کو ان دریافتوں کےلیے دیاگیاتھا جس کی وجہ سے سرطان کےعلاج کا نیا طریقہ وجودمیں آیا جو ٹیومر کو ختم کرنے کے لیے جسم کے دفاعی نظام کا استعمال کرتاہے ۔ قابل ذکر ہے کہ نوبل انعام 1901سے ہرسال ان سائنس دانوں کو دیاجاتاہے جنھوں نے انسانیت کی بھلائی کے لیے اہم دریافتیں کی ہیں ۔ ہرسال میڈیسن کے لیے سب سے پہلے ایوارڈ دیاجاتاہے۔