’چڑیا آزاد ہو گئی!‘ ٹوئٹر پر قابض ہونے کے بعد ایلون مسک کا پہلا ٹوئٹ

واشنگٹن: معروف امریکی کمپنی ٹیسلا اور اسپیس ایکس کے بانی ایلون مسک اب سوشل میڈیا کے مقبول پلیٹ فارم ٹوئٹر کے بھی مالک بن گئے ہیں۔ ٹوئٹر کی کمان سنبھالتے ہی ایلون مسک نے سب سے پہلے کمپنی کے سی ای او پراگ اگروال سمیت اعلیٰ عہدوں پر فائز افراد کو فارغ کر دیا۔ اس کے ساتھ ہی انہوں نے پہلا ٹوئٹ بھی کر دیا ہے، جو موضوع بحث بن گیا ہے۔

ٹوئٹر کا کنٹرول سنبھالنے کے بعد ایلن مسک نے ذومعنی ٹوئٹ کرتے ہوئے لکھا ’’پرندہ آزاد ہو گیا۔‘‘ خیال رہے کہ ٹوئٹر کا لوگو نیلے رنگ کا پرندہ نظر آتا ہے۔ ایلن مسک نے ٹوئٹر کو 44 ارب ڈالر میں خریدا ہے۔ غیرملکی میڈیا کے مطابق ایلون مسک نے الزام عائد کیا ہے کہ انہیں اور سرمایہ کاروں کو ٹوئٹر پر جعلی اکاؤنٹس کی تعداد سے متعلق گمراہ کیا گیا۔

خیال رہے کہ ٹوئٹر کے حوالہ سے ایلون مسک کئی مرتبہ یہ کہہ چکے ہیں کہ وہ ایسا پلیٹ فارم چاہتے ہیں جس پر تمام نظریات کے حامل لوگ آزادانہ طور سے اپنے خیالات کو پیش کر سکیں۔

ایلن مسک کے ٹوئٹر کو سنبھالنے سے قبل ہی تصور کیا جا رہا تھا کہ کئی ملازمین کو فارغ کیا جا سکتا ہے۔ جمعہ کو اس ضمن میں مسک نے سب سے پہلے کمپنی کے سی ای او پراگ اگروار کو برطرف کر دیا۔ رپورٹ میں کہا گیا ہے کہ ایک عہدیدار کو تو کمپنی کے صدر دفتر سے باہر بھی نکلوا دیا گیا۔ اب سبھی کی نظریں مسک کے اگلے قدم پر مرکوز ہیں کہ وہ ٹوئٹر میں مزید کیا تبدیلی کرتے ہیں۔