سعودی عرب: اب ’آب زمزم‘ حاصل کرنا ہوا آسان، ’نسک‘ ایپ کے ذریعہ گھر بیٹھے منگوانے کا راستہ ہموار

اب سعودی عرب کے لوگ اپنے گھر بیٹھ کر آب زمزم کا آرڈر دے سکتے ہیں۔ سعودی عرب کے حج و عمرہ کی وزارت نے ایک نئی سروس کا آغاز کر دیا ہے، جس کے تحت اب ملک کے شہری اور رہائشی براہ راست اپنے گھر پر زمزم کا پانی منگوا سکتے ہیں۔ یہ سہولت ’نسک‘ ایپ کے ذریعہ دستیاب ہوگی۔ اس قدم کے تحت آب زمزم سے متعلق پہلے سے عائد کردہ پابندیاں ہٹا دی گئی ہیں اور اس کا مقصد مذہبی خدمات کے لیے ایپ کے استعمال کو مزید فروغ دینا ہے۔

سعودی عرب کے حج و عمرہ کی وزارت نے اپنے آفیشیل ’نسک‘ ایپ پر ایک نیا فیچر شروع کیا ہے، جس کے ذریعہ اب لوگ 330 ملی لیٹر زمزم کے پانی کی بوتلیں پورے ملک میں کہیں بھی منگوا سکتے ہیں۔ سعودی حکومت کا یہ قدم لوگوں کے لیے زمزم کے پانی تک آسانی سے رسائی کو یقینی بنانے کی سمت میں ایک اہم تبدیلی کے طور پر دیکھا جا رہا ہے۔ اب شہریوں اور رہائشیوں کو زمزم کا پانی حاصل کرنے کے لیے کسی تقسیمی مراکز پر جانے کی ضرورت نہیں ہے۔

سعودی عرب کے کسی بھی خطہ میں رہنے والے لوگ زمزم کا پانی آرڈر کر سکتے ہیں۔ لوگوں کے لیے بوتلوں کی تعداد یا آرڈر کی کوئی حد نہیں ہے، جس قدر چاہیں آرڈر کر سکتے ہیں۔ یہ قدم خاص طور سے ان لوگوں کے لیے کافی فائدہ مند ثابت ہوگا، جنہیں آب زمزم کی تقسیم کے مراکز تک پہنچنے میں مشکلات کا سامنا کرنا پڑتا ہے۔ واضح رہے کہ پہلے زمزم کا پانی بڑے کنٹینروں میں دستیاب ہوتا تھا، لیکن اب اسے 330 ملی لیٹر کی بوتلوں میں تقسیم کیا جائے گا۔ سعودی افسران نے کہا کہ یہ تبدیلی پانی کو لے جانے میں آسانی اور روز مرہ کے استعمال میں سہولیات فراہم کرنے کے لیے کیا گیا ہے۔

واضح ہو کہ سعودی حکومت کی نئی سروس ’نسک‘ ایپ کو ایک وسیع مذہبی پلیٹ فارم میں بدلنے کی سمت میں اٹھایا گیا ایک اہم قدم ہے۔ شروع میں یہ ایپ عمرہ بکنگ کو آسان بنانے کے لیے بنایا گیا تھا، لیکن گزرتے وقت کے ساتھ اس کی سہولیات میں مسلسل توسیع ہوتی رہی ہے۔ اب اس ایپ میں مندرجہ ذیل خدمات بھی شامل ہیں:

• عمرہ ویزا جاری کرنا

• ہوٹل بکنگ

• حج/زیارت کی منصوبہ بندی

• گائیڈلائنز کی معلومات فراہم کرنا

آب زمزم کی ڈیلیوری کے قدم کا باقاعدہ آغاز سعودی عرب کے حج اور عمرہ کے وزیر ڈاکٹر توفیق الربیعہ نے کیا۔ وہ مذہبی شعبہ میں ڈیجیٹل تبدیلی کو فروغ دینے میں اہم کردار ادا کر رہے ہیں۔