شمالی کوریا کے تاناشاہ کم جونگ اون چلتے پھرتے قلعہ کے مانند خصوصی ’سن شائن‘ ٹرین سے پہنچے چین، فوجی پریڈ میں لیں گے حصہ

بیجنگ میں منعقد ہونے والی ایک بہت بڑی فوجی پریڈ میں حصہ لینے کے لیے شمالی کوریا کے تاناشاہ کم جونگ اون چین پہنچ گئے ہیں۔ اس دوران وہ روس کے صدر ولادمیر پوتن اور چین کے صدر شی جنپنگ کے ساتھ اہم میٹنگ بھی کریں گے۔ دلچسپ بات یہ ہے کہ کم جونگ اون ہوائی جہاز کے بجائے اپنی مشہور سبز بکتر بند ٹرین سے چین پہنچے ہیں۔ وہ پیر (یکم ستمبر) کی شام کو پیانگ یانگ سے روانہ ہوئے اور تقریباً 20 گھنٹے کے سفر کے بعد منگل (2 ستمبر) کو بیجنگ پہنچے۔ جنوبی کوریا کی خبر رساں ایجنسی ’ یونہاپ‘ کے مطابق کم جونگ اون کی ٹرین ایک چلتے پھرتے قلعہ کے مانند ہے۔ یہ ٹرین اتنی مضبوط ہے کہ گولی اور بم کا بھی اثر اس پر نہیں ہوتا ہے۔ حالانکہ اس کی رفتار صرف 60 کلومیٹر فی گھنٹہ ہے، جو ہوائی جہاز کے مقابلے میں کافی کم ہے۔

کم جونگ اون کی بکتر بند ٹرین سن شائن میں موجود سہولیات کسی لگزری ہوٹل سے کم نہیں ہے۔ اس میں ایک شاندار آرام دہ بیڈ روم ہے۔ ایک میٹنگ روم ہے، جس میں لال-گلابی چمڑے کی کرسیاں لگی ہوئی ہیں۔ اس کے علاوہ دیواروں پر سجاوٹی لائٹنگ، ریسٹورنٹ کوچ اور سیکورٹی کے لیے خاص سسٹم اور رابطہ سہولیات موجود ہیں۔ جس ڈبے میں کم جونگ اون ہوتے ہیں اس کی جانکاری صرف چند مخصوص لوگوں کو ہی ہوتی ہے۔ ان کے ساتھ ہمیشہ ڈاکٹروں کی ایک ٹیم اور بلیٹ پروف کاریں بھی رہتی ہیں۔

کم جونگ اون کے والد کم جونگ ایل بھی ہمیشہ طویل مسافت بذریعہ ٹرین طے کرنے کو  ترجیح دیتے تھے، کیونکہ انہیں ہوائی جہاز سے ڈر لگتا تھا۔ اب کم جونگ اون نے بھی یہی روایت آگے بڑھائی ہے۔ سال 2019 میں ہنوئی میں ڈونلڈ ٹرمپ کے ساتھ سربراہی اجلاس کے لیے کم جونگ اون نے چین کے راستے ڈھائی روز میں 4500 کلومیٹر کی مسافت ٹرین کے ذریعہ طے کی تھی۔ ٹرین میں ان کی ٹیبل پر اکثر سونے سے جڑا لیپ ٹاپ، خاص سگریٹ باکس اور کئی فون رکھے رہتے ہیں۔ کھڑکیوں پر نیلے اور سنہری رنگ کے پردے لگے ہوتے ہیں۔ حالانکہ کم جونگ اون ہوائی سفر سے ڈرتے نہیں ہیں۔ 2018 میں سنگاپور میں ٹرمپ کے ساتھ ہوئے پہلے سربراہی اجلاس کے لیے انہوں نے ہوائی جہاز سے سفر کیا تھا۔

شمالی کوریا کے تانا شاہ کم جونگ اون اس بار ان 26 لیڈران میں شامل ہوں گے، جو بیجنگ کی فوجی پریڈ میں حصہ لیں گے۔ یہ کم جونگ اون کی کسی کثیر فریقی بین الاقوامی تقریب میں پہلی شرکت ہوگی۔ روس چین اور شمالی کوریا کے سرکردہ لیڈران کا یہ ملاقات نہ صرف سفارتی نقطہ نظر سے اہم ہے، بلکہ یہ عالمی سیاست میں نئی مساوات کی طرف اشارہ بھی ہو سکتا ہے۔