افغانستان میں مورٹار مائن دھماکہ، دو بچے جاں بحق

میدان شہر (افغانستان): افغانستان کے مشرقی وردک صوبے میں مورٹار مائن میں دھماکہ ہونے سے دو بچے ہلاک ہوگئے۔ صوبائی پولیس کے ترجمان یوسف اسرار نے اتوار کو یہ اطلاع دی۔ انہوں نے نامہ نگاروں کو بتایا کہ یہ واقعہ ہفتہ کی شام سید آباد ضلع میں اس وقت پیش آیا جب بچوں نے ایک مورٹار مائن پایا اور وہ اس سے کھیلنے لگے۔ ڈیوائس اچانک پھٹ گئی جس سے ایک ہی خاندان کے دو بچے جاں بحق ہوگئے۔

یہ اپنی نوعیت کا تیسرا دھماکہ ہے جس میں افغانستان میں گزشتہ چھ دنوں میں کئی معصوم بچوں کی جانیں جا چکی ہیں۔ اسی طرح کے ایک دھماکے میں منگل کو شمالی صوبہ جوزجان میں دو بچے ہلاک اور چار دیگر زخمی ہوگئے تھے۔ جمعہ کو ایک اور معاملے میں، جنوبی صوبہ زابل میں ماضی کی جنگوں سے بچ جانے والی بارودی سرنگ پھٹنے سے ایک بچہ ہلاک اور تین دیگر زخمی ہو گئے۔

جنگ زدہ افغانستان مبینہ طور پر دنیا کے سب سے زیادہ بارودی سرنگوں سے متاثرہ ممالک میں سے ایک ہے، کیونکہ چار دہائیوں کے تنازعات، جنگوں اور خانہ جنگیوں سے بچ جانے والے بغیر پھٹنے والے آلات سے ہر ماہ درجنوں افراد ہلاک اور معذور ہو جاتے ہیں۔ ان میں سے زیادہ تر بچے ہیں۔