لیبیا میں بڑا سمندری حادثہ، تارکین وطن کی کشتی غرقاب، 117 افراد لاپتہ

لیبیا: لیبیا کے ساحلی علاقے سے کچھ دور ایک کشتی کے ڈوبنے سے کم از کم 117 لوگوں کے لاپتہ ہونے کا خدشہ ہے۔ اقوام متحدہ کی حمایت یافتہ تارکین وطن کے امور کی بین الاقوامی تنظیم (آئی او ایم) کے ترجمان نے اس حادثے میں بچنے والے لوگوں کے حوالے سے اس بات کی اطلا دی۔

آئی او ایم کے ترجمان فلیویو ڈی گیا کومو نے بتایا کہ تقریباً 120 تارکین وطن کو لے جا رہی ایک کشتی سمندر سے 50 میل کی دوری پر ڈوب گئی۔ تین لوگوں کو بچا کر لامپیڈوسا جزیرہ لایا گیا۔اس حادثے میں بچنے والے لوگوں کے مطابق کشتی پر کل 120 افراد سوار تھے۔ لاپتہ افراد میں 10 خواتین اور دو بچے بھی شامل ہیں۔فلیو یو ڈی گیاکومو نے بتایا کہ لاپتہ افراد میں ایک دو ماہ کا بچہ بھی شامل ہے۔ زیادہ تر مہاجر مغربی افریقہ کے تھے۔ ترجمان کے مطابق لاپتہ مہاجرین میں 40 سوڈانی بھی شامل تھے۔