اسرائیل کے قلیل مدتی اقدامات سے یہودی ریاست کی طویل مدتی سلامتی کو خطرہ لاحق: جسٹن ٹروڈو
کینیڈا کے وزیر اعظم جسٹن ٹروڈو نے ایک انٹرویو میں کہا ہے کہ اسرائیل کے قریبی دوستوں کو اس بات پر تشویش ہے کہ غزہ کی پٹی میں اس کی فوجی مہم اسرائیل کی طویل مدتی سلامتی کو خطرے میں ڈال سکتی ہے
اوٹاوا: کینیڈا کے وزیر اعظم جسٹن ٹروڈو نے جمعرات کو نشر ایک انٹرویو میں کہا ہے کہ اسرائیل کے قریبی دوستوں کو اس بات پر تشویش ہے کہ غزہ کی پٹی میں اس کی فوجی مہم اسرائیل کی طویل مدتی سلامتی کو خطرے میں ڈال سکتی ہے۔
العربیہ کے مطابق ٹروڈو نے کینیڈین براڈکاسٹنگ کارپوریشن کو بتایا کہ اسرائیل کے قریبی دوستوں کی تشویش بڑھ رہی ہے کیونکہ وہ سمجھتے ہیں کہ اسرائیل کے قلیل مدتی اقدامات سے یہودی ریاست کی طویل مدتی سلامتی اور اس کی مستقبل کی حمایت کو بھی خطرہ لاحق ہو رہا ہے۔
ٹروڈو نے واضح کیا کہ اسرائیل کو اپنے دفاع کا حق حاصل ہے لیکن اسے ایسا ان طریقوں سے کرنا چاہیے جو شہریوں پر پڑنے والے اثرات کے بارے میں محتاط ہوں۔
ٹروڈو نے محصور غزہ کی پٹی میں انسانی امداد بھیجنے کا مطالبہ بھی کیا۔ انہوں نے کینیڈا اور بیرون ملک یہود دشمنی کا مقابلہ کرنے کی اہمیت پر زور دیا۔ ٹورنٹو پولیس نے کہا ہے کہ غزہ جنگ شروع ہونے کے بعد سے کینیڈا کے سب سے بڑے شہر میں یہود مخالف اور اسلام مخالف نفرت انگیز جرائم کی تعداد میں نمایاں اضافہ ہوا ہے۔
ٹروڈو بارہا کہہ چکے ہیں کہ 7 اکتوبر کو حماس کے جنگجوؤں کی اسرائیل میں دراندازی کے بعد اسرائیل کو اپنے دفاع کا حق حاصل ہے۔ لیکن جیسے ہی اسرائیل کے فضائی حملوں اور زمینی حملوں کے پرتشدد ردعمل کے نتیجے میں شہریوں کی ہلاکتوں کی تعداد میں اضافہ ہوا ٹروڈو نے آہستہ آہستہ اپنا لہجہ بدلنا شروع کر دیا۔ گزشتہ ہفتے کینیڈا، آسٹریلیا اور نیوزی لینڈ نے غزہ میں ’پائدار جنگ بندی‘ کے لیے فوری بین الاقوامی کوششوں کی حمایت کی تھی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔