دوسرے دور کے مذاکرات میں شرکت پر ایران خاموش، ’ہاتھ ٹریگر پر‘ ہونے کا اعلان، جنگ بندی کی میعاد بدھ کو ختم ہوگی

ایرانی حکومت کی ترجمان فاطمہ مہاجرانی نے امریکہ کے ساتھ دوسرے دور کے ممکنہ مذاکرات کے تناظر میں سخت مؤقف اپناتے ہوئے کہا ہے کہ ایران کا ’ہاتھ ٹریگر پر‘ ہوگا اور دفاعی فورسز مکمل تیاری کی حالت میں رہیں گی۔ انہوں نے سرکاری خبر رساں ادارے کو دیے گئے بیان میں کہا کہ ملک کے سامنے دو حکمت عملیاں ہیں، جن میں جنگ اور سفارت کاری شامل ہیں۔

فاطمہ مہاجرانی نے اس بات کی نہ تو تصدیق کی اور نہ تردید کہ آیا ایران دوسرے دور کے مذاکرات میں شرکت کرے گا یا نہیں۔ ان کا کہنا تھا کہ ایران کی مذاکراتی ٹیم قومی مفادات پر معمولی سمجھوتہ بھی نہیں کرے گی۔

دوسری جانب امریکہ اور ایران کے درمیان جاری جنگ بندی کی میعاد بدھ کو ختم ہو رہی ہے۔ وزیر اطلاعات عطا تارڑ کے مطابق جنگ بندی بدھ کی صبح چار بج کر 50 منٹ پر اختتام پذیر ہوگی۔

دریں اثنا، امریکی صدر ڈونالڈ ٹرمپ نے ایک انٹرویو میں کہا ہے کہ ایران کے پاس مذاکرات کے لیے وفد بھیجنے کے علاوہ کوئی راستہ نہیں۔ انہوں نے کہا کہ اگر بات چیت کامیاب نہ ہوئی تو ایران کے خلاف کارروائی کی جا سکتی ہے۔ ان کے مطابق امریکہ مذاکرات کے لیے مضبوط پوزیشن میں ہے اور وہ جنگ بندی میں توسیع کے حق میں نہیں ہیں۔

ادھر ایرانی عسکری قیادت کی جانب سے بھی سخت ردعمل کا اظہار کیا گیا ہے۔ مرکزی عسکری ہیڈکوارٹر کے کمانڈر میجر جنرل علی عبداللہی نے کہا ہے کہ کسی بھی وعدہ خلافی کا مسلح افواج کی جانب سے بھرپور جواب دیا جائے گا۔ انہوں نے امریکی صدر کے بیانات کو گمراہ کن قرار دیتے ہوئے کہا کہ زمینی صورتحال کو مسخ کرنے کی اجازت نہیں دی جائے گی۔

حالیہ صورتحال میں دوسرے دور کے مذاکرات کے حوالے سے غیر یقینی برقرار ہے کیونکہ ایران کی جانب سے اس میں شرکت کے بارے میں کوئی باضابطہ اعلان سامنے نہیں آیا، جبکہ جنگ بندی کی میعاد کے خاتمے کا وقت قریب ہے اور دونوں جانب سے بیانات کا سلسلہ جاری ہے۔