انڈونیشیا: بحری جہاز میں اچانک لگی آگ، مسافروں نے جان بچانے کے لیے سمندر میں لگا دیں چھلانگیں، 280 لوگ تھے سوار

انڈونیشیا میں ایک بڑا حادثہ پیش آیا ہے، دراصل ایک مسافر جہاز میں اچانک آگ لگ گئی جس کے بعد خوف کے عالم میں لوگوں نے جہاز سے کودنا شروع کر دیا۔ شمالی سولاویسی میں ٹالیس جزیرہ کے پاس کے ایم بارسلونا وی اے جہاز میں اچانک آگ لگ گئی۔ اس خوفناک مناظر کو کئی مسافروں نے اپنے فون میں بھی قید کر لیا ہے۔

حادثے کے شکار مسافر جہاز پر 280 سے زائد لوگ سوار تھے، جس میں کئی بچے بھی شامل تھے۔ آگ لگنے کے بعد گھبرائے ہوئے مسافروں نے آگ سے بچنے کے لیے بلا سوچے سمجھے سمندر میں چھلانگ لگانا شروع کر دیا۔ حادثہ کی اطلاع ملتے ہی انڈونیشیا کی تلاش اور ریسکیو ٹیم نے بڑے پیمانے پر لوگوں کو نکالنے کی کوششیں شروع کر دی ہیں۔ اب تک نہ تو آگ لگنے کی اصل وجہ معلوم ہو سکی ہے اور نہ ہی کسی جانی نقصان کی تصدیق ہوئی ہے۔

مسافروں کے ذریعہ ریکارڈ کی گئی ویڈیو سوشل میڈیا پلیٹ فارم پر تیزی سے وائرل ہو رہی ہے۔ ویڈیو میں واضح طور پر دیکھا جا سکتا ہے کہ جہاز پر سوار لوگ اپنی جان بچانے کے لیے کیسے سمندر میں چھلانگ لگا رہے ہیں۔ ان میں سے زیادہ تر نے لائف سیفٹی جیکٹ پہن رکھی ہے، حالانکہ کئی مسافر تو بغیر لائف سیفٹی جیکٹ کے ہی سمندر میں کود گئے۔ ویڈیو میں سنا جا سکتا ہے کہ لوگ مدد کے لیے زور زور سے آوازیں لگا رہے ہیں۔ آگ کی شدت کا اندازہ اس بات سے لگایا جا سکتا ہے کہ آگ نے پورے جہاز کو اپنی زد میں لے لیا ہے اور سیاہ دھواں کا ایک غبار آسمان کی طرف اٹھتا ہوا نظر آ رہا ہے۔ قریبی ٹالیس جزیرہ سے گزرنے والی کئی ماہی گیری کشتیوں نے کچھ لوگوں کو پانی سے بچایا اور انہیں اپنی کشتیوں میں ساحل تک لے کر گئے۔