ایران-امریکہ کشیدگی کے درمیان ابو ظہبی میں ہندوستان، یو اے ای اور فرانس کا اہم سہ فریقی اجلاس

ابو ظہبی: ایران اور امریکہ کے درمیان بڑھتی ہوئی کشیدگی کے ماحول میں ہندوستان کے خارجہ سکریٹری وکرم مسری متحدہ عرب امارات پہنچے، جہاں انہوں نے فرانس اور یو اے ای کے اعلیٰ عہدیداروں کے ساتھ اہم سہ فریقی اجلاس میں حصہ لیا۔ ابو ظہبی میں ہونے والی اس میٹنگ میں مصنوعی ذہانت، خلائی شعبے اور ثقافتی ورثے سمیت کئی اہم موضوعات پر تبادلہ خیال کیا گیا۔

ہندوستانی وزارت خارجہ کے مطابق وکرم مسری نے یو اے ای کی بین الاقوامی تعاون کی وزیر مملکت ریم الہاشمی اور فرانس کی وزارت یورپ و خارجہ امور کے سکریٹری جنرل مارٹن بریانس کے ساتھ 7 مئی 2026 کو سہ فریقی میٹنگ میں شرکت کی۔ وزارت خارجہ نے سوشل میڈیا پلیٹ فارم ایکس پر جاری بیان میں کہا کہ میٹنگ کا بنیادی مقصد اے آئی، خلائی تعاون اور ثقافتی ورثے کے شعبوں میں اسٹریٹجک اشتراک کو مزید مضبوط بنانا تھا۔

بیان میں کہا گیا کہ تینوں ممالک نے اس بات پر اتفاق کیا کہ سہ فریقی تعاون کو منظم اور باقاعدہ طریقے سے آگے بڑھایا جائے گا تاکہ مختلف شعبوں میں مشترکہ منصوبوں کو نئی رفتار دی جا سکے۔ میٹنگ میں علاقائی اور عالمی سطح پر تعاون کے امکانات کا بھی جائزہ لیا گیا۔

اس سے قبل وکرم مسری نے ہندوستان کے لیے یو اے ای کی خصوصی ایلچی اور وزیر مملکت ریم الہاشمی سے الگ ملاقات کی۔ اس دوران دونوں ممالک کے درمیان دوطرفہ تعلقات اور مختلف شعبوں میں جاری تعاون پر تفصیلی گفتگو ہوئی۔ وکرم مسری نے مبادلہ انویسٹمنٹ کمپنی کے منیجنگ ڈائریکٹر اور چیف ایگزیکٹو افسر خلدون المبارک سے بھی ملاقات کی۔

وزارت خارجہ کے مطابق میٹنگ میں جنوری 2026 میں یو اے ای کے صدر شیخ محمد بن زاید النہیان کے دورۂ ہندوستان اور فروری 2026 میں ابو ظہبی کے ولی عہد شیخ خالد بن محمد بن زاید النہیان کے دوروں کے دوران کیے گئے فیصلوں پر پیش رفت کا جائزہ لیا گیا۔ دونوں فریقوں نے ان اقدامات پر اطمینان کا اظہار کیا۔

بیان میں مزید کہا گیا کہ دسمبر 2025 میں منعقدہ 16ویں جوائنٹ کمیشن میٹنگ اور پانچویں اسٹریٹجک ڈائیلاگ کے نتائج کا بھی جائزہ لیا گیا۔ اس دوران تجارت، توانائی، اقتصادی تعاون، کنیکٹیویٹی، دفاع، سلامتی، فِن ٹیک، صحت، تعلیم، ثقافت اور عوامی روابط سمیت مختلف شعبوں میں جاری شراکت داری پر تبادلہ خیال ہوا۔ دونوں ممالک نے جامع اسٹریٹجک شراکت داری کو مزید مضبوط بنانے کے لیے نئی پہلوں پر بھی غور کیا۔