فرانس، اٹلی اور بیلجیم میں احتجاج کے پیش نظر ہندوستانی شہریوں کو محتاط رہنے کی ہدایت

ہندوستان نے فرانس، اٹلی اور بیلجیم میں مقیم اپنے شہریوں کو احتجاجی مظاہروں کے پیش نظر محتاط رہنے اور مظاہروں والے علاقوں سے دور رہنے کی ہدایت دی ہے۔ وزارت خارجہ نے کہا ہے کہ ان تینوں ممالک میں ہندوستانی سفارت خانے صورت حال پر گہری نظر رکھے ہوئے ہیں اور وہاں مقیم ہندوستانی برادری کے ساتھ مسلسل رابطے میں ہیں۔

نئی دہلی میں جمعہ کو وزارت خارجہ کی دو ہفتہ وار میڈیا بریفنگ سے خطاب کرتے ہوئے وزارت کے ترجمان رندھیر جیسوال نے ہندوستانی شہریوں سے اپیل کی کہ وہ مقامی حکام کی جانب سے جاری کردہ ہدایات اور مشوروں پر عمل کریں۔ انہوں نے کہا کہ مظاہروں والے علاقوں میں جانے سے گریز کیا جائے اور باہر نکلتے وقت مناسب احتیاط برتی جائے۔

رندھیر جیسوال نے کہا کہ فرانس، اٹلی اور بیلجیم میں ہندوستان کے سفارت خانے وہاں کے حالات پر مسلسل نظر رکھ رہے ہیں۔ سفارت خانے مقامی ہندوستانی برادری کے ارکان کے ساتھ بھی باقاعدگی سے رابطہ قائم کیے ہوئے ہیں۔ ان ممالک میں جہاں احتجاجی مظاہرے جاری ہیں، وہاں مقیم ہندوستانی شہریوں کو چوکس رہنے، احتیاط برتنے اور مظاہروں کے مقامات سے دور رہنے کا مشورہ دیا گیا ہے۔

انہوں نے مزید کہا کہ فرانس اور اٹلی میں واقع ہندوستانی سفارت خانوں نے بھی اپنے شہریوں کے لیے الگ سے سفری اور حفاظتی ہدایات جاری کی ہیں۔ ہندوستان بیرون ملک مقیم اپنے شہریوں کی سلامتی اور فلاح و بہبود کو یقینی بنانے کے لیے پابند عہد ہے۔

اس سے قبل بدھ کو فرانس میں ہندوستانی سفارت خانے نے سفری اور حفاظتی ہدایات جاری کرتے ہوئے ہندوستانی شہریوں اور فرانس کا سفر کرنے والے افراد کو محتاط رہنے کا مشورہ دیا تھا۔ سفارت خانے کی یہ ہدایت ایسے وقت میں سامنے آئی جب بڑھتی ہوئی مہنگائی کے خلاف جاری مظاہروں کے دوران تشدد اور جھڑپوں کے واقعات پیش آئے۔

اطلاعات کے مطابق فرانس میں ستمبر کے اواخر میں اسکولوں کی خستہ حالی اور اساتذہ کی کمی کے خلاف احتجاج شروع ہوا تھا۔ بعد ازاں یہ تحریک ملک کے مختلف حصوں میں حکومت مخالف مظاہروں میں تبدیل ہوگئی۔ مظاہرین کی ناراضگی کی اہم وجوہات میں بڑھتی ہوئی مہنگائی، ایندھن کی بلند قیمتیں، سرکاری شعبے کے بجٹ میں کٹوتی اور صدر ایمانوئل میکرون کی حکومت کی پالیسیوں پر تنقید شامل ہیں۔

فرانس میں ہندوستانی سفارت خانے نے اپنے مشورے میں کہا کہ حالیہ واقعات اور مقامی سطح پر نافذ کرفیو کے پیش نظر شہری محتاط رہیں اور ضروری احتیاطی تدابیر اختیار کریں۔ سفارت خانے نے بڑے اجتماعات اور ان بھیڑ بھاڑ والے مقامات سے دور رہنے کی ہدایت دی جہاں مظاہرے ہو رہے ہیں۔

ساتھ ہی شہریوں سے کہا گیا ہے کہ وہ فرانسیسی حکام کی جانب سے جاری کردہ ہدایات پر عمل کریں۔ ہندوستانی حکومت نے واضح کیا ہے کہ متعلقہ سفارت خانے صورت حال پر نظر رکھیں گے اور شہریوں کی حفاظت کے لیے ضروری رہنمائی فراہم کرتے رہیں گے۔