اقوام متحدہ میں افغانستان پر قرارداد، ہندوستان نے ووٹنگ سے کنارہ کشی اختیار کی

اقوام متحدہ جنرل اسمبلی (یو این جی اے) میں افغانستان کی داخلی صورت حال پر پیر کو ایک قرارداد منظور کی گئی، تاہم ہندوستان نے اس قرارداد پر ووٹنگ سے خود کو الگ رکھنے کا فیصلہ کیا۔ قرارداد کو 116 ووٹوں سے منظوری ملی، جبکہ امریکہ اور اسرائیل نے اس کے خلاف ووٹ دیا اور 12 ممالک نے ووٹ ڈالنے سے گریز کیا۔

اقوام متحدہ میں ہندوستان کے مستقل نمائندے پاروتھانینی ہریش نے ہندوستان کے موقف کی وضاحت کرتے ہوئے کہا کہ ’جوں کا توں چلنے دو‘ والا رویہ افغانستان کے عوام کو وہ نتائج نہیں دے سکتا جو عالمی برادری چاہتی ہے۔ ان کا کہنا تھا کہ بغیر کسی نئی اور ہدفی پالیسی کے ہم افغان عوام کی مدد نہیں کر پائیں گے۔

ہریش نے کہا کہ ہندوستان افغانستان کی سلامتی کی صورت حال پر گہری نظر رکھے ہوئے ہے۔ انہوں نے عالمی برادری سے اپیل کی کہ القاعدہ، آئی ایس آئی ایل، لشکر طیبہ اور جیش محمد جیسے دہشت گرد گروہوں کے خلاف متحد ہو کر یہ یقینی بنایا جائے کہ افغان سرزمین دہشت گردی کے لیے استعمال نہ ہو۔

اقوام متحدہ کی قرارداد میں افغانستان میں انسانی حقوق کا تحفظ، بین الاقوامی قوانین کی پاسداری اور دہشت گردی کے خلاف سخت اقدامات کی اپیل کی گئی ہے، کیونکہ وہاں انسانی بحران دن بہ دن سنگین ہوتا جا رہا ہے۔

پاروتھانینی ہریش نے ہندوستان کے وزیر خارجہ ایس جے شنکر اور طالبان کے وزیر خارجہ کے درمیان حالیہ ملاقاتوں کا حوالہ دیتے ہوئے بتایا کہ طالبان نے 22 اپریل 2025 کو پہلگام میں ہوئے دہشت گرد حملے کی شدید مذمت کی تھی۔ اس کے علاوہ، ہندوستان کے خارجہ سیکریٹری اور طالبان وزیر خارجہ کے درمیان بھی دو طرفہ و علاقائی مسائل پر تبادلہ خیال ہوا۔

ہریش نے زور دے کر کہا کہ افغانستان کے ساتھ ہندوستان کا رشتہ ہمیشہ دوستانہ اور خصوصی رہا ہے۔ انہوں نے کہا، ’’ہمارے تاریخی و ثقافتی روابط بہت گہرے ہیں اور ہم افغان عوام کے ساتھ امن و استحکام کے لیے ہمیشہ کھڑے رہے ہیں۔‘‘

انہوں نے بتایا کہ ہندوستان نے افغانستان کو انسانی امداد کی فراہمی میں بھی بھرپور کردار ادا کیا ہے۔ اگست 2021 سے اب تک ہندوستان 50,000 میٹرک ٹن گیہوں، 330 میٹرک ٹن دوائیں، 40,000 لیٹر کیڑے مار دوا اور 58.6 میٹرک ٹن دیگر ضروری سامان فراہم کر چکا ہے۔

ہندوستان نے اقوام متحدہ کے منشیات و جرائم سے متعلق دفتر (یو این او ڈی سی) کے ساتھ مل کر خواتین کے بحالی پروگرام کے تحت 84 میٹرک ٹن دوائیں اور 32 میٹرک ٹن سماجی امدادی سامان بھی فراہم کیا ہے۔ علاوہ ازیں، 2023 سے اب تک 2000 افغان طلبہ کو اسکالر شپ بھی دی گئی ہے۔

ہریش نے واضح کیا کہ صرف سزاؤں پر مبنی پالیسی کارگر نہیں ہو سکتی۔ انہوں نے کہا کہ ہمیں مثبت طرزِ عمل کو فروغ دینا اور منفی سرگرمیوں کو روکنا ہوگا اور تمام فریقوں سے رابطہ برقرار رکھتے ہوئے ایک پرامن و مستحکم افغانستان کے لیے عالمی کوششوں کا ساتھ دینا ہوگا۔ تاہم، موجودہ قرارداد پر ہندوستان نے ووٹنگ میں حصہ نہ لینے کا فیصلہ کیا ہے۔