ممبئی ہی نہیں واشنگٹن کی سڑکیں بھی بن گئی ہیں ندیاں

امریکہ کی راجدھانی واشنگٹن میں سیلاب کا نظارہ دیکھنے کو مل رہا ہے۔ زبردست بارش کی وجہ سے لوگوں کو اپنی جان بچانے کے لیے مشقت کرنی پڑ رہی ہے۔ حالات ایسے ہیں کہ پانی وہائٹ ہاؤس میں بھی گھس چکا ہے۔

تصویر سوشل میڈیا
تصویر سوشل میڈیا
user

قومی آوازبیورو

ممبئی میں موسلادھار بارش کی وجہ سے کئی مقامات پر سیلاب کی صورت حال ہے اور سڑکیں ندیوں جیسا نظارہ پیش کر رہی ہیں۔ لیکن امریکہ کی راجدھانی واشنگٹن ڈی سی میں بھی زوردار بارش کی خبریں ہیں، جس کے بعد وہاں سڑکوں پر پانی ندی کی طرح بہہ رہا ہے۔ واشنگٹن ڈی سی کے حالات اس قدر بدتر ہیں کہ یہاں لوگ کار کی چھتوں پر چڑھ کر اپنی جان بچانے کی کوشش کرتے ہوئے دیکھے جا رہے ہیں۔

دراصل واشنگٹن کی کئی تصویریں سوشل میڈیا پر سامنے آئی ہیں جس سے وہاں کے حالات کا بخوبی اندازہ ہو جاتا ہے۔ خبر رساں ادارہ اے این آئی کے مطابق زبردست بارش کی وجہ سے واشنگٹن ڈی سی میں نارتھ ویسٹر ڈی سی، ساؤتھرن مونٹگومری، ایسٹ سنٹرل لوڈون کاؤنٹی، ارلنگٹن کاؤنٹی، فالس چرچ اور نارتھ ایسٹرن فیئر فیکس کاؤنٹی کے علاقے بری طرح متاثر ہوئے ہیں۔


میڈیا ذرائع کے مطابق پیر کی صبح سے ہی بارش کی وجہ سے واشنگٹن ڈی سی کے حالات خراب نظر آ رہے ہیں۔ سڑکیں تو ندیاں بن ہی گئی ہیں، یہاں ٹرینیں بھی کافی تاخیر سے چل رہی ہیں۔حالات اس قدر خراب ہیں کہ وہائٹ ہاؤس کے بیسمنٹ میں بھی سیلاب کا پانی گھس گیا ہے۔ قابل ذکر ہے کہ وہائٹ ہاؤس میں ہی امریکی صدر کی رہائش ہوتی ہے۔

خبروں کے مطابق واشنگٹن ڈی سی کی یہ حالت یہاں بہنے والی ندی ’پوٹومیک‘ کی وجہ سے ہوئی ہے جس میں بارش کے بعد پانی کافی بڑھ گیا ہے۔ یہاں کینال روڈ کے قریب کا علاقہ سیلاب سے بری طرح متاثر نظر آ رہا ہے۔ امید کی جا رہی ہے کہ آج (منگل) حالات کچھ بہتر ہو سکتے ہیں، لیکن جمعرات کو طوفان کی آمد کا اندیشہ بھی ظاہر کیا جا رہا ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔